«Маннык санааны аан бастаан культура миниистирэ Андрей Борисов эппитэ. Кини ити санаатын олоххо киллэрэн, биһиги артыыстарбыт Японияҕа тиийэн үөрэнэн кэллилэр. А.С.Борисов итини таһынан «Олоҥхо сиригэр Юнеско шедеврдарын көрсүһүүтэ» норуоттар икки ардыларынааҕы фестивалы ыытары көҕүлээбитэ.  Фестиваль иккитэ ыытыллыбытын кэнниттэн Япониялар Саха сиригэр ханна да хатылламмат, атыллыыта суох, инникитин аан дойду культурнай сыаннаһа буолар кыахтаах театр үөскээбитин итэҕэйбиттэрэ», - диэтэ республика федеративнай сыһыаҥҥа уонна тас сибээскэ министиэристибэтин үлэһитэ Ким Борисов.

Ыам ыйын 6 күнүгэр буолбут пресс-конференцияҕа кэпсээбиттэринэн, артыыстар Япония но уонна кабуки театрадарыгар 20 күн устата дьарыктаммыттар.  «Биһиги сегуннар былыргы куораттарыгар сылдьыбыппыт. Онно японецтар күннээҕи олохторун илэ харахпытынан көрбүппүт. Былыргы храмнарга, дыбарыастарга сылдьан Япония культуратын иһиттэн билистибит», - диэтэ олоҥхо театрын салайааччытын солбуйааччы  Мария Турантаева.

Муус устар 10 күнүгэр «Удаҕан кыргыттар» испиктээкили көрдөрбүттэр, ону японецтар олус биһирээбиттэр. «Японецтар үрдүк культуралаах, баай ис туруктаах дьон. Биһиги культураларбыт икки ардыларыгар ханнык эрэ сибээс баарын, сыаннаспыт майгыннаһарын бэлиэтии көрдүлэр», - диэтэ  Ким Борисов.

Бу сырыы чэрчитинэн Япония парламеныгар, правительствотыгар, кабуки уонна но театрдарыгар көрсүһүүлэр буолбуттар. Ону таһынан Саха сирин артыыстара тойон Сакомото Годзины кытта көрсүбүттэр. Кинилэргэ Япония тетрдарыгар тирэх билиини ылбыттарын туоһулуур сертификаттары туттарбыттар.

Япония но театра биһиги олоҥхобут театрыгар, оттон Кабуки Саха театрыгар майгынныылларын режиссер Руслан Тараховскай бэлиэтээтэ.

«Удаҕан кыргыттар» испиктээкил режиссера Степанида Борисова японецтар театр реквизиттэригэр, малыгар-салыгар олус харыстабыллаах сыһыаннарын сөхпүтүн кэпсээтэ. «Кинилэр театры храмы кытта ханыылыы туталлар. Биһиэхэ хаһан оннук буолуой?» - диэн кини өрө көтөҕүллүүлээхтик кэпсээтэ.