Быйылгы 2014 сылга федерация уонна өрөспүүбүлүкэ буддьуотуттэн 9,3 мол. солк., оройуон буддьуотуттэн 5 мол. солк. үп-харчы көрүллэн 17 эдэр ыалга тыырылынна.

Быйылгы үөрүүлээх түгэн балаҕан ыйын 26 күнүгэр ЗАГСа саалатыгар ыытылынна. Ньурба оройуонун баһылыга Борис Попов мустубут эдэр ыаллары кэрэ бэлиэ түгэнинэн эҕэрдэлээтэ, дьиэлэнэн-уоттанан төрөөбүт улуустарыгар олохсуйа хаалалларын баҕарда. Элбэх оҕону төрөтөн, иитэн-такайан, кэскиллээх дьон буола улааталларыгар күүһү-сыраны биэриэхтээхтэрин бэлиэтээтэ уонна судаарыстыба онно сөптөөх көмөну оҥорорун тоһоҕолоото.

Бу күн 12 эдэр ыал күүтүүлээх-үөрүүлээх тугэннэ оҕолуун-уруулуун кэлэн кыттыыны ылла. Бу сертификат көмөтүнэн эдэр ыал саҥа дьиэ туттуохтарын эбэтэр үп эбэн кыбартыыра атыылаһыахтарын сөбүн Ньурба улууһун эдэр ыччаты кытары үлэҕэ исписэлииһэ М. Петрова быһаарда. Ыйыллыбыт тоҕоостоох кэми тутуһалларын эттэ, диэн СИА-ҕа Ньурба оройуонун пресс-сулууспата иһитиннэрэр.