Ол курдук “Альберти циркэтэ” -- искусство, культура эйгэтигэр үлэлиир дьон бэйэ-бэйэлэригэр сыһыаннарын туһунан айымньы. Сүрүн мөккүөр көһө сылдьар циркэ уонна идэтийбит театр ыккардыгар баар утарсыыны көрдөрөр. “Хомойуох иһин, сэнээһин, намтата көрсүү биһиги да испитигэр баар, дьиҥэр театрдар бары биир эйгэҕэ, сыалга-сорукка үлэлиир буоллахпыт. Бу испэктээкилгэ таптыыр идэҕэ бэриниилээх буолуу, таптал, уодаһын, таҥнарыы барыта баар”, -- диэн билиһиннэрдэ режиссер. Испэктээкил репетициятын сааһыары саҕалаабыттар. Бергман айымньыларын Россияҕа туруора илик буоланнар көҥүл суох, онон балачча кэмҥэ эрэйи көрөн ылбыттар. Саҥа премьера сүрүн оруолун – цирк хаһаайынын -- СР үтүөлээх артыыһа Михаил Семенов оонньуоҕа.

Арктика сылынан эбээн суруйааччыта Василий Лебедев “Сир иччитэ” айымньытынан эмиэ биир премьера бэлэмнэнэ сылдьар. Георгий Васильев-Мандар инсценировкатынан театр кылаабынай режиссера Руслан Тараховскай туруорар. Испэктээкили сэтинньи-ахсынны ыйдар быыстарыгар көрөөччү дьүүлүгэр тахсыа диэн эрэннэрдилэр. Бу киһи уонна айылҕа сыһыаныгар олоҕурбут дириҥ ис хоһоонноох айымньы, режиссер 5-6 хайысхаттан хайатын таларын өссө быһаара илигин эттэ.

Оттон юкагир омук остуоруйаларынан режиссер Лена Гримм оҕолорго аналлаах испэктээкили бэлэмнии сылдьар. Ону сэргэ Сент Экзюпери “Аччыгый принц” айымньытынан музыкальнай остуоруйаны туруоруохтаах.

Литература сылын көрсө суруйааччы Дмитрий Таас “Кыһыл көмүс хоруоп” сэһэнин сценарийа суруллан бүппүт. Директор Анатолий Николаев эппитинэн, бу сыл саха, нуучча классиктарын айымньытын театр сценатыгар элбэхтик көрүөхпүт.