Балыыһаны уонна эмчиттэри кытта билсэн баран, профессор кардиологическай уонна лучевой диагностика салааларыгар ыарыһахтарга консультация ыытта.

- Биһиги сүрэхтэринэн күүскэ ыалдьан киирбит хас да ыарыһахтары эмтээһин уонна салгыы кэтээһин туһунан сүбэ ылыахпытын баҕарабыт, - диэн кэпсэтиини саҕалаата уталытыллыбат кардиология салаатын сэбиэдиссэйэ Сардаана Павлова. Бу салааҕа ыалдьыкка үс пациены билиһиннэрдилэр. Кардиолог Оксана Бессонова дакылаатын кэнниттэн Микаэль, докторга уонна ыарыһахтарга эбии ыйыта-ыйыта бэйэтин санаатын эттэ уонна эмтииргэ саас-сааһынан сүбэлэри биэрдэ.

Лучевой диагностика операционнай салаатыгар доктор Рабэус маннааҕы коллегаларын кытта өссө биир ыарыһаҕы эмтээһин ньыматын кэпсээтэ. Консультация кэнниттэн рентген-хирургическай эмстээһин ньымаларын салаатын сэбиэдиссэйин э.т. Виктор Константинов эттэ:

- Бу ыарыһаҕы эмтээһиҥҥэ уустуктар бааллара, ол туһунан маннык үрдүк таһымнаах специалист санаатын интэриэһиргиибит. Профессор Рабэуһы кытта санаабыт сүнньүнэн сөп түбэһэриттэн үөрдүм. Биһиги да медицинабыт таһыма тас дойдутааҕы коллегаларбытыттан хаалсыбатын билэр олус үчүгэй.

Рабэус уонна Семин доктордары өссө Республикатааҕы 3 №-дээх балыыһаҕа күүтэллэр, онно кинилэр онно кырдьаҕас дьону салгыы эмтээһин уонна чөллөрүгэр түһэрии салаатын үлэтин кытта билсиэхтэрэ, Дьокуускай куораттааҕы клиническэй балыыһаҕа, Республикатааҕы онкологическай диспансерга, Дьокуускайдааҕы Медицинскэй кииҥҥэ сылдьыахтара. Кинилэр чэппиэргэ Мэҥэ-Хаҥалас улууһугар баран Майатааҕы улуус Киин балыыһатыгар сылдьыахтара.

- Сүрэх-тымыр ыарыыларыттан өлүү аан дойдуга элбээн иһэр, онон көдьүүстээхтик үлэлиир туһугар инфаркты утары охсуһуу уопутун үөрэтиини кэҥэтэн иһиэххэ наада, - диир Микаэль Рабэус, - ол курдук эһиги республикаҕыт Минздрава ити хайысханы биир саамай сүрүн хайысханан ааттаабыт. Маннааҕы кадрдар үрдүк таһымнаахтар уонна киэҥ иэннээх сиргэ үлэлиир туохха да тэҥнэммэт уопут баар.

Оттон Николай Семин:

- Биһиги эһиги республикаҕыт медицинатын эйгэтэ уонна Швейцария билиилээх клиникаларын икки ардыларыгар быһаччы сибээстэр олохтонуохтара диэн эрэнэбит, – диэн эбэн эттэ.

Бүгүн Швейцария профессора Микаэль Рабэус Дьокуускайдааҕы Национальнай медицина киинигэр кардиологияҕа маастар-кылаас ыытыаҕа.