Ыам ыйын 15 күнүгэр барыта 15 оҕо — 7 уол уонна 8 кыыс Дьокуускай былыыһатыттан таҕыстылар. Бэлиэ күҥҥэ сыһыары тутуллубут үөрүүлээх уонна долгутуулаах тэрээһиҥҥэ кэлбит ыалдьыттар: «Россия ийэлэрэ» бүтүн Россиятааҕы уопсастыбаннай хамсааһын Саха сиринээҕи салаатын салайааччыта Прасковья Борисова, доруобуйа харыстабылын миниистирин солбуйааччы Антонина Григорьева, Дьокуускай куорат мээрин солбуйааччы Евдокия Евсикова, уо.д.а киһиэхэ саамай күндүнү — олоҕу бэлэхтээбит ийэлэри истиҥник эҕэрдэлээтилэр.

Ыал, ийэ, аҕа, оҕо тустарынан этиллибит тыл оҕо эймээрэр саҥатын ортотугар өссө ордук киэркэйэн, тупсан иһилиннэ.

«Дьиэ кэргэммит эрэллээх эркиммит, суон дурдабыт, халыҥ хаххабыт. Дьиэ кэргэммит биһигини барыбытын нус-хас олоҕунан, уоскулаҥынан, тапталынан уонна өйдөбүлүнэн курбуулуу кууһар аналлаах. Оҕо кини кимиттэн тутулуга суох ийэлээх, аҕалаах буолуохтаах. Онон дьиэ кэргэҥҥитин үрдүктүк тутуҥ, харыстааҥ. Бэлиэ күҥҥэ дьиэлэригэр тахсар оҕолор республикабыт, дойдубут дьоһун дьоно буола улаатыахтара диэн бүк эрэнэбин», - Прасковья Борисова.

Кини Саха сиригэр иилээн-саҕалаан, ыйан-кэрдэн үлэлэтэр хамсааһыныгар «Доруобай ийэ — доруобай оҕо» бырайыак сүрүн тосхоллоругар тохтоото.

«Саха АССР төрүттэммитэ 100 сылын киэҥник бэлиэтиэхпит. Бэлиэ күнү көрсө Саха сирин олохтоохторун ахсаанын 1 мөл киһиэхэ диэри тиэрдэр сорук турар. Итиниэхэ бүгүҥҥү ийэлэр улахан кылааты киллэрэллэр», — диэн кини санаатын үллэһиннэ.

Маннык уонна маныаха майгынныыр истиҥ тылы доруобуйа харыстабылын миниистирин солбуйааччы А. Григорьева, Е.Евсикова, уо.д.а. эттилэр. Кинилэр ийэ, оҕо көмүскэлигэр араас хайысхаллаах тэрээһиннэр, дьаһаллар тустарынан эттиилэрин эдэр ийэлэр уруйдаан-айхаллаан, ытыстарын күүскэ таһыннылар. «Россия ийэлэрэ» бүтүн Россиятааҕы уопсастыбаннай хамсааһын, Дьокуускай куорат салалтата, доруобуйа харыстабылын министиэристибэтэ ийэлэргэ барыларыгар бэлэхтэри туттардылар.

"Мин бэйэм идэбинэн бырааспын. «Земскэй луохтуур» бырайыакка хапсаммын, Анаабырга бырааһынан үлэлии барбытым. Бүгүн миэхэ икки хос барааһынньык. Мин кыыспын оҕолонон балыыһаттан тахсыым оруобуна бэйэм төрөөбүт күндү күммэр уонна аан дойдутааҕы дьиэ кэргэн күнүгэр сөп түбэстэ. Онон, бу күн өйбүтүгэр-санаабытыгар, сүрэхпитигэр-дууһабытыгар куруук сөҥөн сылдьара чуолкай. Кыыһым ыам ыйын 5 күнүгэр күн сирин көрбүтэ, ыйааһына — 4 кг. 10 гр. Оҕом төрүүрүгэр көмөлөспүт быраастарга М.Бандероваҕа, Р.Заровняеваҕа улаханнык махтанабын. Уус-Алдан Тулунатын олохтооҕо, 82 саастаах, Находкина Кыыма Васильевнаҕа кыыһым сэттис хос сиэн буолан, эбэбит үөрүүтэ үксүү, сүргэтэ көтөҕүллэ сылдьар. Дьокуускайтан Анаабырга быһа айанныыбыт, онон эбэбит хос сиэнин көрөөрү Тулунаттан кэллэ", - диэн кэпсээтэ Анаабыр улууһун невролог-бырааһа, эдэр ийэ Татьяна Мыреева.

 Фотогалереяны манна көр.