Үөрүүлээх тэрээһин «Маганские агрочтения» научнай-практическай конференцияттан саҕаланна. Дьокуускай куорат баһылыгын солбуйааччы Петр Ефремов, тыа хаһаайыстыбатын управлениетын салайааччыта Яков Алексеев, куорат таһынааҕы бөһүөлэктэр баһылыктара тэрээһин кыттыылаахтарын эҕэрдэлээтилэр.

Научнай-практическай конференцияҕа оскуола үөрэнээччилэрэ сүөһүнү иитии, ветеринария, сири оҥоруу, үүнээйи, о.д.а. тустарынан дакылааттары оҥордулар.

Бу бэлиэ күн чэрчитинэн ыытыллбыт . «Агропояс живет и развивается» быыстапка-дьаарбаҥкаҕа олохтоох табаары оҥорооччулар бородууксуйаларын атыыга таһаардылар.Ол курдук манна Дьокуускайдааҕы көтөр фабрика, Хатастааҕы сибиинньэни иитэр комплекс, «Котрус», «Эм», «Скупченко», «Ким», «Сибирь», «Куочай» бааһынай хаһаайыстыбалар, «Хатас» агрофирма о.д.а кытыннылар.

«Биһиги дьиэ кэргэн биэс оҕону иитэ ылбыппыт. Бэйэбит «Эбиэй» бааһынай хаһаайыстыбалаахпыт. Онно үүт аһылыгы оҥорон таһаарабыт. Тыа хаһаайыстыбатын чэпчэкитэ суох үлэтигэр оҕолорбутун кыра эрдэхтэриттэн сыһыарабыт. Кинилэр улааттахтарына, бэйэлэрин оҕолоругар тыа хаһаайыстыбатын үлэтигэр тапталы иҥэриэхтэрэ диэн санаанан салайтарабыт», - диэтэ Саргылана Григорьева, Тулагы «Эбиэй» бааһынай хаһаайыстыбатын баһылыга.

Тэрээһиҥҥэ спортивнай күрэхтэһии дьон-сэргэ болҕомтотун үөһүгэр буолла. Быйыл иккис сылын Маҥан дьаһалтатын сүүмэрдэммит хамаандата кыайыылааҕынан таҕыста.

Киэһэ тыа хаһаайыстыбатын үлэтин түмүгүн таһаардылар. Бастыҥ үлэлээхтэргэ 50 тыһ.солк. суумалаах граннары туттардылар. Үүнээйини олордууга «Котрус», «Скупченко» хаһаайыстыбалар уһулуччулаах үлэлэрэ бэлиэтэннэ. Сүөһүнү иитиигэ Андреев бааһынай хаһаайыстыбата уонна «Сардаана» ХЭТ, «Хатас агрофирма» ХЭТ биһирэннилэр.

Тыа хаһаайыстыбатыгар өрө тахсыылаахтык үлэлээбит дьон үрдүк наҕараадаларынан бэлиэтэннилэр.