«Бу куонкуруска элбэх ыччат кыттыбытыттан биһиги олус үөрдүбүт. Төрөөбүт төрүт тыл иитиигэ-такайыыга сүрүн акылааты айар, олугу уурар. Бу сылга үктэнэн баран, маннык тэрээһини иккиспитин ыытабыт. Устудьуоннарбыт маннык саҕалааһыны хара бастакыттан өйөөн, олус көхтөөхтүк кытыннылар. Кинилэр бу уонна маныаха майгынныыр тэрээһиннэри сөбүлээбиттэрин биллэрэллэр», – диэтэ суруйааччыга анаммыт нэдиэлэни тилэри толкуйдаабыт, ылсан үлэлээбит, техникум уһуйааччыта Надежда Громова.

Техникум библиотеката көрөөччүлэргэ анаан Реас Кулаковскай кинигэлэрин быыстапкатын тэлэччи тарта, кини айымньыларын ымпыктаан-чымпыктаан ырытар ис хоһоонноох тэрээһиннэри ыытта. Устудьуоннар «Ийэ тыл иитэр суолтата» литература чааһыгар Саха сирин суруйааччыларын сойууһун бэрэссэдээтэлин Иван Мигалкины кытта көрүстүлэр. Кини Реас Кулаковскай, саха литературатын, о.д.а. иһитиннэриитин болҕомтолорун үөһүгэр туттулар, бу тула санааларын атастастылар, ирэ-хоро-кэпсэттилэр. Техникум уһуйааччылара уонна үөрэнээччилэрэ Реас Кулаковскай төрөөбүтэ 100 сылыгар анаммыт бэлиэ, үөрүлээх тэрээһиҥҥэ сырыттылар.

Р.А.Кулаковскай үбүлүөйүгэр анаммыт кураторскай чаастар техникум бары бөлөхтөрүгэр олус сэргэхтик аастылар.