Испиктээк иннинэ театр салайааччыта  Александр Алексеев «Ньырбакаан» туруоруу үөскээбит историятыттан кэпсээтэ. Национальнай интсруменнар оркестрдара балаҕан ыйыгар Х-с аан дойдутааҕы норуот музыкатын фестивалыгар ситиһиилээхтик кыттыбытын, театр инники үлэтин билиһиннэрдэ. Сергей Зверев — Кыыл Уола төрөөбүтэ 115 сылыгар анаан туох тэрээһиннэр ыытыллалларын кини сиһилии кэпсээтэ.

 «Ньырбакаан» испиктээк былырыын тохсунньу 12 күнүгэр дьоҥҥо-сэргэҕэ аан бастаан көрдөрүллүбүтэ. Манна саха былыргы историята, XVI-с үйэҕэ Саха сирэ Арассыыйа састаабыгар киирэрэ кэмин хабар. Аҕа уустарыгар араарыллыбыт сахалар ортолоругар тыҥаабыт уустук кэмнэр испиктээккэ бу баардыы көһүннүлэр. Бүлүү сирдэрин төрүттээбит Ньырбакаан дьылҕата көрөөччүгэ олус тиийимтиэ, сүрэххэ-дууһаҕа иҥэр гына бэрилиннэ.

Испиктээги муусуканан киэргэтиини СӨ искусствотын үтүөлээх деятелэ  Владимир Ксенофонтов оҥордо, туруорааччы-режиссер — РФ культуратын үтүөлээх үлэһитэ, САССР үтүөлээх артыыһа - Афанасий Федоров, туруорааччы-хореограф – РФ уонна СӨ үтүөлээх артыыһа  Афанасий Соловьев, туруорааччы-худуоһунньук – СӨ культуратын туйгуна  Марьяна Оконешникова, туруорааччы-дирижер – СӨ искусствотын үтүөлээх деятелэ Николай Петров.