Миниистири солбуйааччы эппитинэн, «Ыарахан быһыыга-майгыга түбэспит киһи» диэн өйдөбүл аны суох буолар. Ол оннугар «Социальнай өҥөнү оҥорооччу уонна туһанааччы» диэн терминнэр киирэллэр. Социальнай өҥөнөн туһанааччы аҕыс критерийэ үөскэтиллэр. Итинтэн түөрдэ дьиэ кэргэҥҥэ сыһыаннаахтар.

Холобур, дьиэ кэргэн имбэлиит оҕолоох буоллаҕына, социальнай өҥөнөн туһанааччы кини эрэ буолбат, дьиэ кэргэн барыта туһанааччы ахсааныгар киирсэр.

 Чааһынай сектор социальнай көрүүгэ-истиигэ кырата суох миэстэни ылар. Бизнеһи манна тардар туһугар государство кэккэ чэпчэтиилэри, ол иһигэр нолуокка чэпчэтиини олохтуур. СИА-ҕа эппиттэринэн, Саха сирин сорох оройуоннарыгар бу эйгэҕэ государственнай-чааһынай бииргэ үлэлээһин номнуо саҕаламмыт. Оннук, Хаҥалас улууһугар сэттэ нэһилиэккэ социальнай үлэни предпринимателлэр оҥороллор. «Уус-Байдам» компания наймылаһыы дуогабарынан социальнай үлэни тэрийэр. Ону таһынан кинилэр төлөбүрдээх өҥөлөрү эмиэ оҥороллор. Холобур, соҕотох кырдьаҕастарга дьиэлэрин өрөмүөннүүллэр. Онно үлэтэ суох сылдьааччыларын түмэ тардаллар», - диэн кэпсээтэ Хаҥалас улууһун социальнай көрүү-истии киинин специалиһа Марианна Петрова.

Урукку өттүгэр үлэ быһыы-майгы уустугурбутун эрэ кэнниттэн ыытыллар эбит буоллаҕына, билигин  дьон итиниэхэ диэри тиийбэттэрин туһугар эрдэттэн сэрэтэр үлэ ыытыллар. Ыарахан быһыыны-майгыны эрдэттэн сэрэтэбит», - диэтэ Муома улууһун социальнай көрүү-истии киинин дириэктэрэ  Антонина Щелканова.

Эрдэттэн сэрэтии үлэтин көдьүүһэ номнуо биллибит. Ол курдук, уруккута  ыарахан туруктаах 45 дьиэ кэргэн баар эбит буоллаҕына, ити билигин 25 диэри аччаабыт.