Кооператив үлэтин сүрүн хайысхата – арыыны, ону таһынан үрүҥ аһы астааһын, тыа хаһаайыстыбатын бородууксуйатын батарыы уонна бэйэлэрин маҕаһыыннарын нөҥүө бородууксуйаны атыылааһын. Тэриллиэхтэриттэн улуус бөдөҥ маҕаһыыннарын кытта бородууксуйаны батарыыга дуогабардаахтар.

Үүтү сүрүннээн «Даадар» уонна «Кириэс Халдьаайы» кооперативтар, бааһынай уонна кэтэх хаһаайыстыбалар туттараллар. Кооператив муниципальнай сакааһынан оройуон оҕо саадтарын, балыыһаларын, оскуолаларын, тэрилтэлэрин бородууксуйанан хааччыйар. 2014 с. ахсынньы 31 күнүнээҕи туругунан 480,303 т үүтү туппуттар. Сыл устата 16,98 т арыы, 33,57 т үүт бородууксуйа оҥоһуллубут.

Кириэс Халдьаайы федеральнай суолтан кытыы, өрүс уҥуор сытар буолан, кооператив эбии кыһалҕаны көрсөр. Онон паром атыылаһарга дуогабар түһэрсибит.

«Илгэ» 2008 сыллаахха саҥа собуот тутуутун саҕалаабыта. Сылын аайы үлэҕэ киллэрэ сатыыллар да, тоҕо эрэ кыаллыбат. 2014 с. 32680 тыһ. солк. суумалаах анал тэрил таҥыллыбыт. Быйыл эмиэ «Дьэ киллэрэбит, барыта «Туймаада-Лизингтэн» тутулуктаах», диэн буолла. Онон бу собуоту үлэлэтии улуус тыатын хаһаайыстыбатыгар кытары биир сүрүн соругунан буолар.