«Кистэл буолбатах, мин Ойуунускай элбэх айымньыларын кытта үлэлиибин. Кэнники кэмнэргэ миэхэ харда оннугар ыйытыым элбээн иһэр: кини тус бэйэтин, айар үлэтин, дьылҕатын, харизматын туһунан. Бу олох соторутааҕыта эмиэ альбому арыйан, кини киэҥник биллибит, НКВД хаайыытыгар түһэриллибит бүтэһик хаартыскатын өр одуулаан олордум. Харахтарын сыныйан көрдүм. Сирэйин биир өттө итэҕэтиилээх, сырдык, сэниэлээх, инникитин билэр, оттон иккиһэ — олох өһөн хаалбыт курдук көһүннүлэр. Платон Ойуунускай бу түгэҥҥэ тугу санаабыта буолуой? Гений, улуу поэт, бэйэтин норуотун дьылҕатын, республикатын туһугар тиһэх хааппыла хаанын биэрэргэ бэлэм киһи. Кини тиһэҕэр тугу санаабытай? Кини, арааһа, саамай сүрүн туһунан - саха норуота инникитин туохха тирэниэҕин санаабыта буолуо. Хомойуох иһин, мин хоруйу ылбатым, ол эрээри, айар киһи быһыытынан, санаабын салҕаатым. Кини биир научнай үлэтин үөрэтэн баран, кини ураты көстүү – саха тылын харыстааһын, сайыннарыы уонна киэҥ эйгэҕэ таһаарыы туһунан толкуйдаабытын өйдөөтүм. Кини улуу эпос — Олоҥхо, итэҕэл, айымньыларын сүрүн хайысхатын — сырдык кэскилгэ итэҕэл туһунан санаабыт», - диэтэ Борисов.

Өссө Ойуунускай саха норуота дууһатыгар таҥараны илдьэ сылдьар диэн итэҕэйэрэ, диэн бэлиэтээтэ Андрей Саввич.