Егор Борисов компания историятын, бары салайааччыларын туһунан дьэҥкэтик билэрин, Федор Андреев компания президенин дуоһунаһыгар үлэлиир кэмэ аан дойдуга үп-харчы, экономика кризиһин кэмигэр түбэспитин бэлиэтээн эттэ. «Бу уустук кэмнэргэ компанияны быыһыыр сорук турбута. Компания дириэктэрдэрин сэбиэтэ уонна менеджмент икки ардыларыгар хардарыта өйдөһүү, өйөһүү баара 2008-2009 сыллардааҕы ураты уустук кэмнэри туоруурга сүрүн олугу уурбута. Ону таһынан дойду президенэ Владимир Путин компанияны тус бэйэтэ өйөөбүтэ ураты суолталаммыта. Онтон ити өйөбүлү ылыы Федор Андреев итэҕэтэр кыаҕыттан уонна булгуруйбат, кытаанах санаатыттан быһаччы тутулуктаммыта», - диэтэ Егор Афанасьевич.

Өрөспүүбүлүкэ олоҕо нус-хас, бигэ буоларыгар Федор Андреев киллэрбит кылаата кырата суоҕун Егор Борисов чиҥэтэн эттэ.

«Федор Борисович компания урукку дьыалаларын, бүгүҥҥү туругун уонна инникитин иһин эппиэтинэһи бэйэтигэр ылыммыта. Кини үлэ коллективыгар өйдүүн-санаалыын, сүрэхтиин-дууһалыын чугас этэ, кинилэр интэриэстэрин элбэхтэ турууласпыта. Ол да иһин үлэ коллективыгар да, өрөспүүбүлүкэҕэ бүтүннүүтүгэр да ытыкабылынан туһаныан туһанар», - диэтэ кини.

Компания государство бас билиитигэр хаалбытыгар, IPO ситиһиилээхтик ааспытыгар, тардар, угуйар кыаҕа күүһүрбүтүгэр, аан дойду таһымыгар инники кирбиигэ тахсар үрдүк көрдөрүүлэри ситиспитигэр Федор Андреев сүрүн миэстэни ылбытын Саха сирин баһылыга эттэ.

«Федор Борисовичтыын арахсарбытыттан хомойобун. Ол эрээри, кини компания кэтээн көрөр сэбиэтигэр чилиэн быһыытынан хаалыаҕа уонна бииргэ үлэлээччилэрэ сөптөөх суолу тобулалларыгар уонна ону тутуһалларыгар сүбэлиэ-амалыа диэн бүк эрэллээхпин», - диэтэ Егор Борисов уонна Саха сирин үрдүкү наҕараадатын - «Хотугу сулус» уордьаны үөрүүлээх быһыыга-майгыга туттарда.

Федор Андреев харда тылыгар 2009 сыллаахха бу дуоһунаска соҕотох кандидат буолбутуттан үөрбүтүн билиннэ. «Саха сирин бырабыыталыстыбата дьоһун уонна сөптөөх киһини компанияны салайыы уруулугар туруоруо дии саныыбын. Саҥа салайааччы компания олоҕунан олороругар, үөскүүр ыарахаттары, эндирдэри эрдээхтик туорууругар баҕарабын", - диэтэ.

Федор Борисович сарын сарынтан өйөнсөн бииргэ үлэлээбит дьонугар уонна чуолаан Егор Борисовка истиҥник махтанна.

Федор Андреев «АЛРОСА» АК кэтээн көрөр сэбиэтин чилиэнинэн хаалар. Компания президенин эбээһинэһин бастакы вице-президент Илья Рящин быстах кэмҥэ толорор. Алтынньы 23 күнүгэр кэтээн көрөр сэбиэт мунньаҕар компания салайааччытынан ким ананарын ырыппатылар.