"Куораттааҕы Дума 3-с сессиятыгар биһиги куораппытыгар оскуолаҕа киириэн иннинээҕи тэрилтэлэри тутарга үп биэрэр туһунан быһаарыныы ылыммыттара. Ити оҕо тэрилтэлэрэ тиийбэттэрин кыһалҕата бүтүн Россия үрдүнэн турар. Бүгүн биһиги бу боппуруос дьэ хамсаан эрэриттэн, тутуу саҕаламмытыттан олус үөрэбит.

Билигин оҕо саадтарын үп-техника өттүнэн тирэхтэрэ олус тутах.Үгүстэрэ ааспыт үйэ 60-70-с сыллардааҕы тутуулар. Мал-сал саҥардыллыбат, аныгы олбуордара суохтар, онон бу кыһалҕа олус сытыытык турар", - диэтэ депутат Марина Силкина.

Депутат Антонина Кычкина этэринэн, Российскай Федерация саҥа "Үөрэх туһунан" сокуонун быһыытынан оскуола иннинээҕи тэрилтэлэр уопсай үөрэхтээһин систиэмэтигэр киллэриллибиттэрэ. "Оскуолаҕа киириэх иннинээҕи үөрэх сүрүн сыала — оҕону сайыннарыы, оскуолаҕа бэлэмнээһин, ол аата ааҕарга-суоттуурга үөрэтии буолбакка, оҕо оонньуур дьоҕурун сайыннарыы. Хомойуох иһин, биһиги биир да оҕо саадын аттыгар кырачааннар оонньуур дьоҕурдарын сайыннарыыга эппиэттэһэр сири көрбөтүбүт. Мин саҥа, соторутааҕыта тутуллубут тэрилтэлэр туһунан эппэппин", - диэн бэлиэтээтэ кини.

"Биһиги куорат Думатыгар ити кыһалҕаны быһаарарга сонун этиилээхпит", - диэтэ А. Кычкина.

Үөрэх управлениетын начальнига Алексей Петров оҕо саадын таһа куттала суох, оҕо сайдыытыгар бары өттүнэн туһалаах буолуохтаах диэн бэлиэтээтэ. "Төһө да оҕо саадтарын коллективтара олбуордарын бэйэлэрин күүстэринэн тупсара сатааталлар, площадкалар эргэрбиттэрин, аныгы ирдэбилгэ эппиэттээбэттэрин билиниэххэ наада. Депутаттар көҕүлээһиннэрин куорат думата өйүөҕэ диэн эрэнэбин, онон биһиги кыттыһан ити кыһалҕаны быһаарыахпыт уонна оҕо саадтарын таһын тупсарыахпыт дии саныыбын», - диэтэ кини.