Алексей Михайлович отуттан тахса сыл прокуратура уорганнарыгар үлэлээбитэ. Билигин прокуратура бэтэрээнэ, РФ үтүөлээх юриһа, балтараа сыл анараа өттүгэр СӨ Киһи быраабыгар боломуочунайынан анаммыта. Кини бу кытаанах тастаах, дьоһун көстүүлээх, нууччалыы уонна сахалыы тылынан тахсыбыт хомуурунньугар ахтыылар, уочаркалар, интервьюлар, ыстатыйалар киирбиттэр. Хабар тиэмэтэ киэҥ – суверенитет, ил-эйэ, промышленность эйгэтигэр экономическай куттал суох буолуутун проблемалара, буруйу оҥоруу араас көрүҥнэрэ, киһи быраабын көмүскээһин уо.д.а. Кинигэ бүтэһик салаатыгар Алексей Ефимов бэйэтэ силиэстийэлээбит холуобунай дьыалаларыгар олоҕурбут кэпсээннэр киирбиттэр.

Алтынньы 31 күнүгэр национальнай уус-уран музейга буолбут кинигэни билиһиннэрэр дьоро киэһэҕэ СӨ Оҕо быраабыгар боломуочунай Анна Соловьева, саха норуодунай суруйааччылара Наталья Харлампьева, Сэмэн Тумат, «Күрүлгэн» сурунаал редактора Афанасий Гуринов-Арчылан, прокуратура бэтэрээннэрэ, Алексей Михайлович биир идэлээхтэрэ, биир дойдулаахтара, доҕотторо, чугас аймах-билэ дьоно сырыттылар.

Киэһэни СӨ Үрдүкү суутун судьуйата Игорь Николаев бэрт сэргэхтик салайан ыытта. «Харьковтааҕы юридическай институкка үөрэммит оҕолортон саамай чаҕылхайбыт Алексей этэ, кинини устудьуоннар да, преподавателлэр да убаастыыллара. Ырытар дьоҕурдаах дьиҥнээх юрист. Бу кинигэтэ – муус көһөҥө бэрт кыра үөһэ эрэ өттө, айымньылар өссө да суруллуохтара. Манна уустук, киһи өйүттэн кыайан айбат, триллер курдук күүстээх айымньылар бааллар. Маннык кинигэни суруйарга эр санаа наада» диэн киирии тылынан кини дьоро киэһэни аста. Бэлиэтээн эттэххэ, Игорь Игнатьевич киһи иһиттэр истэ олоруон курдук интэриэһинэйдик ыытар эбит. Кини кыбытык тылларыттан, эбии быһаарыыларыттан киһи элбэҕи билэр-иҥэринэр.

Бу киэһэ Алексей Ефимов аҕата Михаил Прокопьевич туһунан элбэх үтүө тыл этилиннэ, кини аата үгүстүк ахтылынна. Учуутал, суруйааччы, романтик, лектор, агитатор, дьикти киһи – бу барыта кини аҕатын туһунан. Манна даҕатан эттэххэ, Алексей Михайлович бэйэтин да туһунан элбэҕи иһиттим, биллим: кини суруйууларын эрэ туһунан буолбакка, прокуратураҕа үлэлээбит кэмнэриттэн саҕалаан, билиҥҥи дуоһунаһыгар тиийэ элбэх санаа этилиннэ. Олоҕун тухары сиэрдээх быһыы, кырдьык иһин охсуспут киһи дьон быраабын туруулаһар дуоһунаска саамай сөпкө анаммыт диэн эттилэр. «Бөлөһүөк эрэ киһи кыайар дуоһунаһыгар үлэлиир, бу кинигэтэ быраап эрэ өттүнэн буолбакка, бөлөһүөктээһин кинигэ» диэн СӨ Суруйааччыларын сойууһун бэрэссэдээтэлэ Наталья Харлампьева бэлиэтээтэ.

Төрөөбүт улууһуттан, Чурапчыттан эҕэрдэлии кэлбит баһылыгы солбуйааччы Иннокентий Матвеев Алексей Ефимов улуус киэн туттар дьонуттан биирдэстэрэ буоларын бэлиэтээн туран, «Улууһун иннигэр үтүөлэрин иһин» диэн үрдүк бэлиэ туттарда. «Биһиги үлэбитин атын өттүттэн көрдөрбүккэр улахан махтал, бу кинигэни аахтаҕына, дьон прокуратура үлэһиттэрин атын хараҕынан көрүөҕэ» диэн прокуратура бэтэрээннэрин аатыттан Любовь Пестерева эттэ. Норуодунай суруйааччы Сэмэн Тумат «саха өрөспүүбүлүкэтин юристарын сериятын олохтуургут буоллар» диэн баҕа санаатын тиэртэ. Бу кинигэ юридическай, психологическай факультеттарга үөрэнэр устдьуоннарга методическай пособие буолуон сөп уонна бүтүннүү сахалыы тылбаастанара буоллар диэн хас да киһи бэлиэтээтэ. Бэйэм санаабар, биһиэхэ, суут-сокуон тиэмэтигэр идэтийэн суруйар суруналыыстарга эмиэ олус наадалаах, туһалаах кинигэ тахсыбыт.

Биллэрин курдук, прокуратураҕа үлэлии сылдьыбыт дьонтон айар үлэнэн Николай Федоров – Ньукулай Уус уонна Леонид Диодоров утумнаахтык дьарыктаналлар. Ааҕааччы сэҥээриитин ылбыт кинигэлэрдээхтэр. Аны прокурор-суруйааччылар кэккэлэрин Алексей Михайлович Ефимов хаҥаттаҕа.

Арай маннык дьоһун кинигэ 300 эрэ ахсаанынан тахсыбыта хомолтолоох. Онон, ити балаһыанньаны көннөрөр сыалтан, өрөспүүбүлүкэ ааҕааччыларыгар тиийдин, дьон-сэргэ аахтын-биллин диэн, 50 устуука национальнай библиотекаҕа (улуустарга тарҕатарга), 10 устуука М.К.Аммосов аатынан ХИФУ библиотекаларыгар уонна биир экземпляр национальнай архыыпка бэриллибитин үөрэ иһиттим.