«Хаарчаана Куо» уобараһын биллиилээх дизайнер-модельер Августина Филиппова «Кыһын Саха сириттэн саҕаланар» фестиваль чэрчитинэн толкуйдаабыта.

Конкурс сыала — саха Хаарчаанатын уобараһын билиһиннэрии, саха омук үгэстэрин сайыннарыы, харыстааһын уонна киэҥник тарҕатыы. Конкурсу тэрийээччилэр уонна ыытааччылар: «Бриллиантовые нотки» (Дьокуускай), «Жизнь городов» (Москва) фестивальнай кэмитиэттэр, «Хикари» туристическай фирма.

Конкурс Саха сирин предпринимательствоҕа уонна туризм сайдыытын дьыалаларыгар Министерство, Дьокуускай куорат администрациятын, Августина Филиппова дизайн-студиятын өйөөһүннэринэн ыытыллар.

Конкурска айар коллективтар уонна биирдиилээн түмсүүлэр кыттыылаахтара, оскуола үөрэнээччилэрэ, орто анал уонна үрдүк үөрэх кыһаларын студеннара — 5-тэн 18-гар диэри саастаах кыргыттар кыттыахтарын сөп.

Дьүүллүүр сүбэҕэ биллиилээх искусство деятеллэрэ, культура үтүөлээх үлэһиттэрэ, үөрэх тэрилтэлэрин баһылыыр педагогтара, биллэр артыыстар, композитордар, музыканнар киириэхтэрэ.

Конкурс хас да кэрдиистээх. Кыттааччылар Хаарчаана таҥаһын көрдөрүөхтэрэ, бэйэлэрин, хоббиларын туһунан кэпсиэхтэрэ. Итини таһынан өйү тургутар тур баар буолуоҕа. «Кыһыҥҥы фантазия» кэрдиискэ кыргыттар бэйэлэрин дьоҕурдарын көрдөрүөхтэрэ. Түмүк кэрдиис — киэһээҥҥи былааччылаах дефиле.

Конкурс түмүгүнэн кыайыылаах уонна анал бириистэр хаһаайкалара быһаарыллыахтара.