Ону таһынан, бу эрэ сыллаахха нэһилиэнньэ уонна ветеринарнай сулууспа үлэһиттэрин күүстэринэн улуус биэс нэһилиэгэр ветеринарнай пууннар үлэҕэ киирдилэр.

Бу олох соторутааҕыта Үөдэй нэһилиэгэр саҥа ветпуун үлэтин саҕалаата. Ааспыт сыллаахтан үөдэйдэр маһы бэлэмнээбиттэрэ, дьиэ холлоҕоһун туруорбуттара. Сайын устата ис үлэтин, оһох оҥорбуттара, уот киллэрбиттэрэ. ДьТХГА-тын бүтэрбит ветврач Сардаана Слепцова үлэтин сылаас киэҥ «офиска» саҕалаата.

«Мин Орто Халыматтан кэлбитим, үс сылга дуогабардаахпын, - диэн кэпсиир эдэр специалист. - Олохтоохтор миигин олус истиҥник көрүстүлэр. Нэһилиэгинэн бары кэлэн ханапаакылыырга, кырааскалыырга, ыраастыырга көмөлөспүттэрэ. Үөдэй — кыра дэриэбинэ, сүөһү барыта ааҕыыга сылдьар, онон үлэлииргэ чэпчэки. Бу күннэргэ ынахтартан лейкозка уонна бруцеллезка хаан ылыытын саҕалыам. Билигин ыалга олоробун, ол эрээри сотору уопсай дьиэ биэриэхтээхтэр».

Ветпууннар бары наадалаах эмтэринэн хааччыллыбыттар, вакциналар кэмигэр кэлэллэр, диэн ветсулууспа салайааччытын солбуйааччы Александр Николаев кэпсиир, ол эрээри, үлэҕэ эдэр кадрдары сыһыарыы кыһалҕата син-биир баар. Ветеринарияҕа үлэлиир дьон 70-тан тахса бырыһыаннара 50 саастарын аһарбыт дьон. Ол иһин сулууспа да, улуус администрацията да эдэр специалистар кэлэллэригэр сыраларын уураллар, сүрүнэ, тыаҕа олохсуйалларыгар кыһаналлар. Итини ситиһэргэ үлэ уонна олох усулуобуйатын тупсарыы ирдэнэр. Нэһилиэктэргэ саҥа ветпууннары тутуу – улахан үлэ сорҕото. Нэһилиэктэр администрациялара ветеринарияны куруук өйүүллэрин, олохтоохтор тутууга уонна тупсарыыга үөрүүнэн көмөлөһөллөрүн бэлиэтиир тоҕоостоох. Ветеринарнай управление бэйэтин өттүттэн бюджет таһынааҕы үптэн норуот тутуутугар көмөлөһөр.

Сотору кэминэн ветеринардар саҥа дьиэлэрэ Тумулга, Өктөмҥө, Иһиккэ уонна Улахан-Ааҥҥа баар буолуохтара.