Биэс нэһилиэги килиэбинэн хааччыйар «Южное» ХЭТ потребобщество бэйэтин бас билэр дьиэлэрин, оборудованиеларын чааһынайдарга куортамҥа биэрбитэ, тоҕо диэтэххэ, улахан тэрилтэ кыра нэһилиэктэргэ бэкээринэни тутара ночооттоох. Итиннэ биирдиилээн дьон ылыстылар.

Елена Лотова кэргэнинээн, биирдиилээн предпринимателинэн регистрацияланан баран, Иһит нэһилиэгин килиэбинэн хааччыйарга быһаарыннылар. Куортамы биир сылга түһэристилэр, төлөбүрэ ыйга 5 тыһыынча. 70 кубометр мас атыыластылар, муус хаһааннылар. 130 тыһыынча солкуобайга «Южное» ХЭТ 140 куул бурдугу биэрдэ, ол аата биир киилэтэ 18,5 солкуобай. Итини Лотовтар сыл устата төлүөхтэрэ. Бэкээринэ күҥҥэ 60 килиэби таһаарар. Сайын сакаас элбиир, онно күҥҥэ 140 кэриҥэ килиэби буһараллар. Килиэп сыанатын Лотовтар уларыппатылар, онон 36 солкуобайга атыылыыллар.

«Мин бэйэ дьыалатын саҕалыырга бу бэкээринэҕэ бэйэм үлэлээбит буоламмын сөбүлэспитим, - диэн кэпсиир Елена Лотова, - Өскөтүн мин аккаастаммытым буоллар, бэкээринэни арааһа, саппыт буолуо этилэр, оччоҕо дьон бэйэлэр астаныахтара эбэтэр ыраах сытар ыаллыы нэһилиэктэртэн баран атыылаһыахтара эбитэ буолуо. Килиэби маҕаһыыҥҥа туттарбаппыт, барытын бэйэбит атыылыыбыт, онон харчыта бэйэбитигэр хаалар. Аччыгый бэкээринэ атыылаһыахпытын баҕарабыт, ити быдан барыстаах, онно кыра кээмэйдээх уонна кондитерскай оҥоһуктары астыахпыт этэ. Субсидияҕа докумуон биэрэн көрүөхпүт, баҕар государствоттан ханнык эмэ көмө киириэ, оччоҕуна атахпытыгар турарбытыгар, салгыы сайдарбытыгар чэпчэки буолуоҕа».

Улуус администрациятын экономическэй сайдыыга управлениета хас биирдии чааһынай бэкээринэ үлэтин болҕомтолоохтук кэтээн көрөр былааннаах, «килиэптээх» дьыала нэһилиэккэ олус суолталаах бизнес. Итини таһынан маннык тэрилтэлэргэ бурдук сыанатын уонна уоту субсидиялыыр туһунан боппуруоһу ырытыахтара.