Покровскай тракт оройуонугар чааһынай дьиэҕэ биир аймаҕым олорор. Сыл аайы муус ыларын билэр этим. Быйыл күһүн муус ыларга көмөлөһүннэрэ ыҥырбытыгар, саатар эрэ буоллаҕа, тиийэн үлэлээтим. Хатас анныгар начаас ылан бүттүбүт. “Өрөбүл аайы аны муус кэлэн ылыам” диэн сэрэттим. “Күөл мууһа элбэх, харыстаабаппын” -- киһим хоруйа боростуой.

Массыынабын собуоттаан бастакы партиябын ыла нөҥүө субуотаҕа айаннаатым. Улуустан хортуоппуй аҕалбыт куулларбыттан үһүн эргитэ сылдьан кичэйэн тэбээтим. Кыра хааллаҕына да туох буолуой -- бары да буорга-бадарааҥҥа буккуллан улааппыт оҕолорбут. Сытыы чохороон сүгэбинэн муустары килиэп аҥарын саҕа кээмэйдээх гына кыралаатым. Куулларбар толору симтим. Баайталаан баран багажникка быраҕаттаатым. Массыына кэлин өттө төһө да сөрүүн буоллар, баҕар ириэ диэн сонунан саба бырахтым.

Квартираҕа көтөҕөн мадьалытан таһааран, балкоҥҥа уурталаатым.

Лаахтаах биэдэрэҕэ киллэрэн уулаатым.

Сарсыарда туран уубутун оргуттубут. Саха ыала муус уутун астына иһэн ким үөрэнэ, ким үлэлии тарҕастыбыт.

Барыыһа тугуй?

Үп өттүнэн. Ааҕан көрүөххэ. Биир куулга, көтөҕөн көрдөххө, отучча киилэ муус баар. Ууллардахха 30-ча лиитирэни үктүүр бадахтаах. Саамай ырааһынан (сир анныттан хостуубут дииллэр) биллэр “Чистая вода” 19 л. истээх бытыылката 150 (бэйэҥ тиийэн ылар буоллаххына 120) солкуобай. Атыттар сыаналара чэпчэки (60-100 солк.), тоҕо диэтэххэ кыраан уутун сиидэлээн атыылыыллар. 19 лиитирэни 120-нэн ыллахха, биир куул муус сыаната 180 солк. тэҥнэһэр. Үс куул -- 540 солк. Нэдиэлэ иһинэн бүтэрэр буоллаххына, ыйга 2160 солк тахсар. Улахан экономия!

Доруобуйа өттүнэн. Сахаларга Туймаада хочотун күөллэрин уута -- төрөөбүт уубут буоллаҕа. Учуонайдар этэллэринэн, муус уута ыраас уонна туһалаах битэмииннэрдээх. “Куорат мууһа туох аанньа үһүө...” диэмэҥ, суол кытыытыттан тэйиччи, массыына тиийбэт күөлэ Туймаадаҕа элбэх. Муус ылыах айылаах сир Табаҕа диэки, Бүлүүлүүр суолу кыйа, Намныыр суолга бааллар. Ити эргин олорор дьоннуун кыттыһыҥ, кинилэр билэллэр. Элбэх киһи Күөх Хонууга киирэн Өлүөнэ өрүстэн муус ылаллар. Муус -- эмиэ күн уота, салгын курдук айылҕа дьоҥҥо төһө баҕарар туһанарыгар анаабыт бэлэҕэ.

Наада:
Муустаах доҕор (аймах)
Сүгэ
Хас да куул
Биэдэрэ
Массыына