Куоракка кыһынын муус атыылыыр саха уолаттара бааллар эбит. Кинилэр муус ылар сирдэрин билэн, онно тиийдим. Муус уутун биһиги, сахалар, былыр-былыргыттан иһэн кэллэхпит. Тоҕо куорат сиргэ олохсуйдубут да ол үгэспит быстан хаалыахтааҕый?
Кэнники кэмҥэ мууһу ылыы технологията быдан уларыйбыт эбит. Урукку курдук анньыыны, тордуоҕу туһамматтар. Арыыта суох сыаптаах Stihl эрбиинэн мууһу үөһэттэн кубик гына тэһитэ эрбииллэр. Уонна луомунан олуйан таһаараллар.
Урбаанньыт Руслан Винокуров манан дьарыктаммыта ырааппыт. "Өрүс мууһун атыылыыбын. Дьон сөбүлүүрүн иһин. Ыраас диэн ааттыыр. Күөл уута арыый саһархай буолар, тааҥнаах диэччилэр. Тус бэйэм күөл уутун да сирбэппин. Хатас таһынааҕы күөллэртэн ылыахха сөп, эрээри таһыыта ыраах" - диир Винокуров.
Кини этэринэн, кузовка 3,5 куб.м муус киирэр. "Биир массыынаны ортотунан 2,5 тыһ. солк. атыылыыбын. Биллэриибин интернетинэн биэрэбин. Сакаас күһүнүн элбэх буолааччы, билигин мөлтөөтө. Атыыга барар буолан, эстетиканы эмиэ көрөбүн -- ойдубуттары туора быраҕан иһэбин. Көнө быһыылаахтары эрэ атыылыыбын. Сылын аайы Күөх Хонуу боротуохатыттан ылабын. Күһүн манна ыһыах курдук буолар, эр киһи барыта киирэн муус ылар. Таарыччы “бырааһынньыктыыллар” даҕаны" - диэтэ урбаанньыт.
Руслан Винокуров бытыылкалаах ууну бастааҥыттан сэҥээрбэт эбит. "Атыылыыр урбаанньыттар уу микробун барытын өлөрөн баран, хаттаан минерализациялыыллар. Артезианскай дииллэр. Киһи сир аннынааҕыны буолбакка, сир үрдүнээҕи ууну иһиэхтээх. Эбэтэр букатын да кыраан уутун фильтрдээн атыылыыллар. Куруутун иһэргэ муус уута ордук" - бэлиэтээтэ кини.
Комментарии
Авторизация на сайте через социальные сети