СӨ норуодунай депутата Елена Голомарева норуот маастарыгар Ил Түмэн Махтал суругун туттарда. Ассоциация президенэ Андрей Кривошапкин Полина Ивановна талааныгар сүгүрүйэрин эттэ. Бу күн норуот маастарын аатыгар үгүс үтүө тыл этилиннэ, элбэх тыыннаах сибэкки дьөрбөтө уонна махтал суруктар, грамоталар туттарылыннылар.

Быыстапкаҕа сылдьыбыт дьону Полина Семенова таба тириититтэн дьахтар таҥаһын комплега, эр киһи кура, түүлээхтэн суумкалара, балык уҥуоҕуттан киэргэллэрэ кичэллээх уустук тигиилэринэн сөхтөрдүлэр. Оҥоһуктара айылҕа кырааскатынан киэргэтиллибит, дьэрэкээн оһуорунан быысыбайдаммыттар. Көс олохтоохтор илдьэ сылдьар таба тириититтэн тигиллибит көбүөрдэрэ үрүҥ, хара өҥүнэн тупсаҕайдык аттарыллыбыт.

Норуот маастара СИА корреспонденыгар эппитинэн, кини кыратыттан дьонун көрөн эбэҥки үгэс ииһигэр үөрэммит. "Иистэнии көс олохтоохтор сүрүн дьарыктарынан буолар. Эбэм Анастасия Николаевна Афанасьева миигин элбэххэ уһуйбута. Кини үөрэҕин салҕаан эдэр көлүөнэҕэ сатабылбын тиэрдэбин", -- диэтэ кини.