Быыстапкаҕа 200-тэн тахса үлэ турбутуттан, сүүсчэкэтэ – худуоһунньук Мария Егорова үлэлэрэ. Мария Михайловна фабрикаҕа сүүрбэччэ сыл айымньылаахтык үлэлиир. Кини илиититтэн сукунаттан, тирииттэн, сарыыттан ураты оҥоһуктар айыллан тахсаллар. Былыргы үгэстэри аныгылыы хараҕынан көрөн, оҕуруонан, туос, муос киллэһиктэринэн киэргэтэн, ойуунан, быысапканан тупсаран, ситэрэн-хоторон биэрэр. Ол да иһин кини үлэлэрин «Сардаана» бастыҥ бородууксуйатын быһыытынан сыаналанар. 

«1969 сыллаахха «Сардаана» фабрика норуот уус-уран оҥоһуктарын сөргүтэр, сайыннарар сыаллаах тэриллибитэ. Төһө да ыарахан сыллар аасталлар, ол сыалын толорон кэллэ дии саныыбын. Бүгүн бу быыстапкаҕа фабрикаҕа сүүрбэлии-отуттуу сыл үлэлээбит маастардар үлэлэрин дьоҥҥо-сэргэҕэ көрдөрүүгэ таһаардыбыт. Мындыр өйдөөх, талааннаах тарбахтаах, кэрэни үрдүктүк тутар маастардар баар буолан, өбүгэлэрбититтэн илдьэ кэлбит үгэстэрбитин сүтэрбэтибит, төттөрүтүн саҥа таһымҥа таһаардыбыт. Мария Михайловна үлэлэрэ сылтан сыл дириҥ ис хоһооннонон, уустугуран, тупсан иһэллэриттэн биир бэйэм астынабын», – диэн «Сардаана» фабрика генеральнай дириэктэрэ Варвара Андреева тоһоҕолоон бэлиэтээтэ. 

«Биһиги урут былаанынан, социалистическай куоталаһыынан сирдэтэн үлэлиирбит. Ону таһынан элбэх общественнай үлэ баара. Үлэ бөҕөтүн үлэлиир да эбиппит. Билигин саҥа үйэ маастардара биһиги саҕалаабыппытын ситэрэн, саҥалыы көрөн, сайыннаран үлэлииллэриттэн үөрэбит», – диэн норуот маастара, үлэ бэтэрээнэ Матрена Сивцева эттэ. 

Быыстапкаҕа сахалыы көстүүмнэр, чаппараахтар, паннолар, хартыыналар, сувенирдар көрдөрүүгэ тураллар. Саха норуотун ииһин-ууһун, уус-уран оҥоһуктарын кэлэн көрүҥ, сэргээҥ, кэрэни кэрэхсээҥ.