Быыстапканы "Симэх" арт-галерея уонна Өксөкүлээх Өлөксөй аатынан Норуоттар доҕордоһууларын киинэ иккис төгүлүн тэрийдэ. Бу искусттво саҥа көрүҥэр интэриэс улаатан иһэрин кыттааччы ахсаана элбээбитэ туоһулуур. Маастардар араас матырыйаалтан харыйа оонньуурун оҥорон аҕалан, "Берегиня" оҕо дьиэтигэр бэлэхтээтилэр. Быыстапка чэрчитинэн "Любомира" диэн норуоттар доҕордоһууларын кэрэһилиир куукуланы оҥоруу күрэһэр Хаҥаластан Татьяна Лыткина кыайда. 

"Киһи илиитинэн бэйэтэ оҥорор куукулата ураты уонна хатыламмат, биир эрэ ахсаанынан оҥоһуллар. Элбэх бириэмэни, сыраны, толкуйу эрэйэр үлэ. Куукула майгытын, настарыанньатын,  культураны, норуот үгэстэрин, таҥаһын-сабын көрүөххэ сөп. Биһиги бастакы быыстапкабыт кэнниттэн Куукуланы оҥорооччулар союзтара  тэриллибитэ. Атын регионнары кытары сибээс олохтонон, икки маастар Хабаровскайга баран, кыайан-хотон кэлбитэ", -- диэн "Симэх" арт-галерея үлэһитэ Радомира Баишева СИА корреспонденыгар кэпсээтэ.  

"Мин туоһунан дьарыктанабын. Ол эрэн, сынньана таарыйа, куукулалары оҥорор буолбутум үһүс сылым, -- диэн кэпсиир Мэҥэ-Хаҥалас Суолатыттан сылдьар маастар Василий Андросов. -- Барыта 20-тэн тахса куукуланы оҥордум. Ол эрэн биири да атыылыыр санаам суох. Дууһаҕын бүтүннүү ууран туран оҥорбутуҥ кэнниттэн, хайдах эрэ оҕоҥ курдук буолан хаалаллар. Биир куукула ый курдук оҥоһуллар. Бастаан уобараһын толкуйдаан, эскиһин оҥороҕун. Олус умсугутуулаах үлэ. Куукуланы оҥорооччулар "ватсапка" туспа бөлөхтөөхпүт, онно маастар-кылаастары ыытааччыбыт. Интэриэс баар буолан, быыстапка таһыма үрдээн иһэр". 

Куукула быыстапката тохсунньу 15 күнүгэр диэри "Симэх" арт-галереяҕа (Аржаков уул., 6) туруоҕа.