Сэргэх быыстапканы Национальнай библиотека кыраайы үөрэтэр салаата уонна Сибиир, Дальнай Восток уонна Хоту сир норуоттарын документальнай культурнай нэһилиэстибэлэрин регионнар икки ардыларынааҕы иһитиннэрэр киинэ тэрийдилэр.

- Ийэ тыл уонна сурук-бичик күнүнэн ыытыллар кинигэ быыстапкатыгар биһиги кииммит эбээн, эбэҥки, дьүкээгир, долган, чукотка тылларынан тахсыбыт литературалары дьоҥҥо-сэргэҕэ билиһиннэрэр. Бүгүн манна кэлбит ыалдьыттар аан дойдуга биллэр-көстөр ааттаах-суоллаах учуонай Василий Роббек«Эбээн-нуучча тылдьытын”, дьүкээгир поэта, учуонай Гаврил Курилов “Дьүкээгир-нуучча тылдьытын”, эбээн поэта, учуонайа Василий Кейметинов “Эбээн-нуучча тылдьыта. Быһаарыы уонна этимология” бөдөҥ үлэлэрин кытта билсиэхтэрэ, о.д.а. көрүөхтэрэ-истиэхтэрэ, - диир библиотека Сибиир, Дальнай Восток уонна Хоту сир норуоттарын документальнай культурнай нэһилиэстибэлэрин регионнар икки ардыларынааҕы иһитиннэрэр киинин библиотекара Галина Карадчина.

Маны сэргэ, быыстапкаҕа кэлбит ыалдьыттар нуучча-саха, саха-нуучча, орфографическай, тылы-өһү быһаарар, о.д.а. тылдьыттары көрүөхтэрэ. Оттон библиотека үлэһиттэрэ ыччат дьон төрөөбүт тылын билэригэр-көрөрүгэр, үөрэтэригэр эрэнэллэр.