Директор Любовь Никитина СИА корреспонденыгар «Гулун» Хотугу норуоттар үҥкүүлэрин народнай ансамбла государственнай театр аатын ылыытыгар диэри уһун суолу ааста диэн эттэ. «Ансамблбыт тэриллибитэ 25 сыл буолла. Театр буола үүнүөхпүт диэн санаабат да этибит, бу олус үөрүүлээх, долгутуулаах уонна эппиэтинэстээх. Үс ый устата 40 үҥкүүнү уонна эбэҥки үһүйээнинэн «Кыталык-кыыс» спектаклы туруордубут», - диэтэ кини.

Театр юкагир биллиилээх поэта уонна суруйааччыта Николай Курилов айымньытынан «Үрүҥ бөрөлөр туһунан үһүйээн» спектаклы бэлэмниир былааннаах.

«Гулуннар» государственнай статуһу өссө 90-с сыллар саҕаланыыларыттан туруорсубуттара, уонна дьэ Арктика сылыгар ону ситистилэр. Театр өбүгэлэрбит искусстволарын көлүөнэттэн көлүөнэҕэ тиэрдэн иһиэҕэ. Төрүт олохтоох норуоттар үгэстэрэ, абыычайдара үйэлэргэ сүтүө суоҕа. Бу кэлэр кэм театра», - диэтэ Ил Түмэн Арктика дьыалаларыгар, Хотугу аҕыйах ахсааннаах төрүт олохтоох норуоттар боппуруостарыгар комитетын салайааччы Елена Голомарева.

Елена Голомарева аны аҕыйах сылынан, баҕар, театр бэйэтэ туспа дьиэлэниэҕэр эрэлин биллэрдэ.