«Искусство уонна культура аныгы социологическай, экологическэй-философскай кыһалҕалара» диэн научнай-практическай конференция Парижка, Латинскай Америка Дьиэтигэр – хоту дойдуну чинчийээччи Шарко урукку резиденциятыгар буолла.

Конференцияҕа аныгы культура тирээн турар кыһалҕаларын уонна боппуруостарын ырыттылар. Сүнньүнэн, аҕыйах ахсааннаах норуоттар искусстволарын, төрүт олохтоохтор уонна аборигеннар культураларын, аныгы искусстволарын теоретическэй уонна методологическай кросс-культурнай чинчийиилэрин дьүүллэстилэр. Биһиги республикабытыттан Саха сирин художниктарын Сойууһун президенэ Юрий Спиридонов, искусствоведение кандидата Ия Покатилова, ХИФУ норуоттар икки ардыларыгар ситимнэрин салайыы французскай киинин директора Изабелла Борисова кытыннылар.

Париж VIII-с университетын галереятын улахан саалатыгар «Тымныы сылааһа-1» үөрэтэр-культурнай бырайыак кыттыылаахтарын вернисаһа, быыстапка-перформанса ыытылынна. Кытыылаахтар ортолоругар художниктар уонна дизайнердар: Юрий Спиридонов, Михаил Старостин, Дьулустан Бойтунов, Галина Окоемова, Ольга Рахлеева, Сардана Иванова, Мария Седалищева уонна да атыттар бааллар.

Франция өттүттэн Дьокуускайга ыытыллыбыт III-с «BY-14» актуальнай искусство биенналегэ Бразилия, Венесуэла, Англия, Франция 10 биллиилээх художниктарын талыллыбыт үлэлэрэ турдулар. Тэрээһин тэрийээччилэрэ уонна кыттыылаахтара Дьокуускайдааҕы «BY-14» биеннале бырайыагынан, биенналегэ бэлэмнэнии бюллетеннэрин уонна күннүктэрин бэлэмнээһиҥҥэ бииргэ үлэлээһин туһунан илии баттастылар. Эрдэ француз специалистара Саха сирин ити бөдөҥ культурнай тэрээһинин сокуратордарынан буоларга уонна манна аан дойдутааҕы статуһу биэриигэ уонна тас дойдуга киэҥник тарҕатыыга үлэлииргэ сөбүлэҥнэрин биэрбиттэрэ.