«Дьоҕус модульнай станциялары бэйэбит базабытыгар оҥорор буолбуппут син ыраатта. Киин иһинэн тимири чочуйар, трансформатордары өрөмүөннүүр сыахтардаахпыт. Быйылгыттан уматыгы кутар улахан емкостары оҥорор буоллубут», – диэн хампаанньа генеральнай дириэктэрэ Сергей Губскай кэпсиир. Билигин манна энергетиктэр Өлүөхүмэ Үҥкүрүгэр эһиил илдьиллиэхтээх блок-модуллары оҥоро сылдьаллар. Маннык модуллары балтараа ыйынан оҥорон бүтэрэллэр. Бу кэннэ кыһыҥҥы суол аһылынна даҕаны, олохтоох миэстэтигэр тириэрдэллэр.

Чочуйар сыахха уот ситимнэригэр, мас, тимир, бетон тирэхтэргэ, остуолбаларга туһаныллар буолталары, гайкалары, тимир конструкциялары оҥороллор. Саҥа оборудование атыылаһаннар, уруккуттааҕар үлэлэрэ биллэ тэтимирбитин этэллэр.

Быйыл хампаанньа хоту улуустардааҕы филиалларыгар 103 дизельнэй оборудованиены, 53 генераторы, 68 трансформаторы, 5 хочуолу, 102 км усталаах уот ситимин уонна 3 км кэриҥэ ититии тиһигин өрөмүөннээбиттэр. Кыстыгы этэҥҥэ туоруурга анаан өрүс суолунан 77 тыһ. т дизельнэй уматыгы, 4,3 тыһ. т ньиэп бородууктатын уонна 30,9 тыһ. т таас чоҕу тиэйбиттэр.

Усуйаана Хайырыгар, Туматыгар, Эдьигээн Баахынатыгар, Өймөкөөн Үчүгэйигэр уонна Өлүөхүмэ Дэлгэйигэр саҥа дизельнэй электростанциялар тутуллан үлэҕэ киллэриллибиттэр. Күн уотунан үлэлиир 1 МВт кыамталаах станцияны эһиил Дьааҥы Баатаҕайыгар тутар былааннаахтар. «Бу Россия үрдүнэн биир саамай улахан кыамталаах станция буолуоҕа», – диэн Сергей Губскай чопчулаан эттэ.