Национальнай ойуулуур-дьүһүннүүр музей «Саха сирин раритета» бырайыагын төрдүс сылын ыытар. Бу киэҥ сэҥээриини ылбыт бырайыакка Чурапчы (2011 с.), Таатта (2012 с.), Уус-Алдан (2013 с.), Хаҥалас (2013 с.) улуустар кыттыбыттара.

Сунтаар сирэ айылҕа баайынан эрэ буолбакка, дириҥ силистээх культурнай үгэстэринэн биллэр. Манна Саха сирин социальнай-экономическай, духуобунай сайдыытыгар кылааттарын киллэрсибит дьон: Г.П. Терешкин, Д.Д. Сивцев, С.А. Зверев-Кыыл Уола, М.Н. Тимофеев-Терешкин, Л.А. Попов, Г.Е. Бессонов, Б.Н. Андреев о.д.а. төрөөн-үөскээн ааспыттара. Тимофеевтар, Поповтар династиялар биллэр-көстөр суолу-ииһи хаалларбыттара.

Быыстапкаҕа улуус 13 музейын ханна да суох сыаналаах экспонаттара — Ыһыахха туттуллар мас иһит-хомуос, сылгы симэҕэ, көмүстэн оҥоһуктар, дьиэҕэ-уокка туттуллар мал-сал – көрдөрүүгэ туруоруллуохтара.