Маргарита Алексеевна бочуоттаах сынньалаҥҥа олорон айар үлэнэн ылсан дьарыктанар, араас быыстапкаларга кыттар. Кини кыратыттан уруһуйдуурун сөбүлүүрэ, айылҕа матырыйаалыттан оҥоһуктары айара. Оскуолаҕа үөрэнэр сылларыгар оскуола, нэһилиэк, оройуон быыстапкаларыгар ситиһиилээхтик кыттара.

Маргарита Алексеевна кинини уһуйбут учууталларыгар Елизавета Иннокентьевна Оконешниковаҕа, Виктор Маркович Конолецка махтанарын этэр. «Кинилэр дьоҕурбун арыйбыттара, дьылҕабын түстэспиттэрэ. Итиэннэ иис-уус кистэлэҥин арыйбыт эдьиий дьоммор Анна Николаевна Илларионоваҕа, Галина Иннокентьевна Степановаҕа махтанабын. Араас кинигэлэри, сурунааллары ааҕан, быыстапкаларга, «Симэх» айар кииҥҥэ ыытыллар маастар-кылаастарга сылдьан элбэххэ үөрэммитим. Гуляева Ольга Ивановна, Петрова Евдокия Иннокентьевна, Петрова Светлана Ивановна, Козлова Дария Семеновна, Шишигина Татьяна Николаевна, уо.д.а. сатабылларын, билиилэрин-көрүүлэрин миигин кытта куруутун үллэстэр», – диэн этэр уран тарбахтаах маастар.

2010 сыллаахтан Маргарита Чалбанова куораттааҕы, өрөспүүбүлүкэтээҕи, Россиятааҕы быыстапкаларга тиһигин быспакка кыттар. 2012 сыллаахтан үлэлээбэт пенсионердарга уруһуй, таҥас кырадаһыныттан тигиигэ куруһуок аһан үлэлэтэр.

Быйыл атырдьах, балаҕан ыйдарыгар төрөөбүт Сунтаарын нэһилиэнньэлээх пууннарыгар быыстапкатын туруорбута, маастар-кылаастары ыыппыта.