Быыстапкаҕа сиэлтэн, мастан, талахтан оҥоһуктар, сахалыы таҥастаах куукулалар, айылҕа матарыйаалларыттан хартыыналар көрдөрүүгэ турдулар.

"Утахчаан" куруһуок салайааччыта Сардаана Борохина:

-Данира мин куруоһакпар 7 кылаастан кэлбитэ. Кини олус сэмэй, ол гынан баран кытаанах санаалаах, туруоруммут сыалын хайаан да ситиһэр дьүккүөрдээх. Онон кини талаана уонна дьулуура тэҥҥэ дьүөрэлэһэнбыыстапкаҕа тахсар таһымнаах үлэлэроҥоһулуннулар. Төрөппүттэрэ Мария Дмитриевна уонна Василий Дмитриевич иистэнэр-уһанар дьоҕурдаах дьон. Оҕо дьоҕура эрдэттэн сайдарыгар төрөппүт оруола улахан, ол иһин быыстапкабытын "Уран утума" диэн ааттаатыбыт. Бастаан "Уол уонна кыыс" диэн үлэни сыл устата мастан кыһан оҥорбуппут. Онтубут улууска научнай-практическай конференцияҕа ситиһиилэнэн салгыы сайдарга кынаттаабыта. Үлэбит хайысхатын уустугурдан, маһынан саха иһиттэрин, туттар тэриллэрин хомуллар (мозаика) гына оҥорууга көспүппүт. Ону быйыл ситэрэн хамыылаах "Таба таай" диэнтолкуй оонньуутун айдыбыт. Уһуйааннар, оскуолалар, улахан да дьон сэргээтилэр. "Таба таай" диэн саха таабырыннарын, өс хоһооннорун таайыыга ыйытык оонньуу буолар. Саха тылын, үгэһин үөрэтэргэ дьарык курдук тутуллуон сөп. Бу оонньуубут "Национальные традиции" диэн норуоттар икки ардыларынааҕы конференцияҕа лауреат аатын ылбыта. Оҥоһукпутугар патент ылыахпытын баҕарбыппыт да, 100 000 солкуобайы көрдөөннөр, тохтоон хааллыбыт. Талааннаах оҕо бииринэн эрэ муҥурдаммат эбит. Динара үчүгэй үөрэнээччи, оскуола хаһыатын редактора, видеостудия режиссера ону тэҥэ музыка студиятыгар эмиэ дьарыктанар. Ити бүгүн "Ийэбэр" диэн сүрдээх үчүгэй, нарын ырыатын иһиттигит. Данира ситиһиилэрэ үөрэнээччилэргэ үтүө холобур буолар, - диэтэ.

Данира дьарыгын туһунан маннык кэпсээтэ:

-Мин кырабыттан ийэм иистэнэрин, аҕам уһанарын көрөн улааппытым. Сэттис кылаастан ыла Сардаана Юрьевна салайар "Утахчаан" куруһуогар дьарыктанабын. Уһаннахпына, иистэннэхпинэ үлэм түмүгүттэн олус дуоһуйабын. Дьарыгым үөрэхпэр мэһэйдээбэт. Туризм хайысхалаах үөрэххэ киириэхпин баҕарабын. Бу дьарыкпын "хобби" курдук илдьэ сылдьан өссө сайыннарыам. Уус-иис идэтигэр сыһыарбыт ийэбэр, аҕабар, итиэннэ дьоҕурбун сайыннарбыт куруһуогум салайааччытыгар Сардаана Юрьевнаҕа, быыстапкам туруутугар сүбэ-ама буолбут доҕотторбор уонна Амма киин библиотекатын кэлэктиибигэр сүрдээх улахан махталбын тиэрдэбин.

Быыстапкаҕа турбут оҥоһуктары болҕойон көрдөххө бэйэ бэйэлэрин хатыласпат туспа тыыннаахтар. Хас биирдиилэрэ Данира иэйиитин, санаатын, толкуйун илдьэ сылдьаллар. Мин үлэ элбэҕин буолбакка, оҥоһуктар хаачыстыбаларын уонна бары кэриэтэ олоххо туттуллар сыаллаахтарын бэлиэтии көрдүм. Ол курдук, истиэнэҕэ ыйанар айылҕа матарыйаалларыттан оҥоһуллубут паннолар, хартыыналар, дэйбиирдэр уонна да атын дьиэҕэ туттуллар туһалаах тэриллэр бааллар. Оскуола оҕотун холугар киһи сөҕөр элбэх үлэтин, толкуйун, мындырын көрдүбүт. Быыстапканы көрө кэлбит оҕолор "Таба таай" онньууга бэйэлэрин билиилэрин холонон көрдүлэр. Улахан дьон оҥоһуктары тутан-хабан олус биһирээтилэр.

Ис иһиттэн сырдык, сахалыы сэмэй эдэр маастар кэрэни айар талба талаана өссө сайдан нэһилиэгин, улууһун дьонун үөрдэ, кэрэхсэтэ турдун диэн алгыыбыт.