Норуот депутатын приемугар кэлбит дьон туруорсар тус кыһалҕалара республика үгүс олохтооҕун кытта атылыы.

Холобура, быйыл Аҕа дойду Улуу сэриитигэр Кыайыы 70 сыла туоларынан сибээстээн, “Аляска – Сибиир” авиатрассанан көтүүгэ дозаправка сулууспатыгар трактористаабыт тыыл ветеранын көрдөһүүтүн депутакка тиксэрэ кини кыыһа кэлбит. Депутат тыыл ветераныгар республика Ил Дарханын электроннай почтатыгар ити туһунан сурук суруйарыгар сүбэлээтэ.

Куоракка Хатыҥ Үрэххэ чааһынай дьиэ туттубут элбэх оҕолоох ыал аҕата газ киллэринэригэр ыалларын эрдэ кыттыгас тардыммыт ситиминэригэр холбоноругар харчы көрдүүллэрин уйунар кыаҕа суоҕун туһунан эттэ. Александр Романов бу боппуруоһу быһаарыыга сөптөөх суоллары ыйан, туһааннаах сүбэлэри биэрдэ.

Бу күн депутакка Мархаттан канализацияны тутуу уонна киин куораттан олорор дьиэ боппуруостарыгар өссө икки киһи кэлэн кэпсэтэн, туруорсар кыһалҕаларын быһаарыллар суолларын тобулан бардылар.

Александр Романов приемун кэмигэр киниэхэ киирбит бары көрдөһүүлэри тус хонтуруолугар ылла.