Таһырдьа төһө да 51 кыраадыс тымныы сатыылаан, үүт туман бүрүйэн турдар, быыстапка-дьаарбаҥкаҕа кыттаары тоҕус нэһилиэктэн уопсайа 62 хаһаайыстыба кэллэ. Олор ортолоругар: 14 – тыа хаһаайыстыбатынан, 14 – бааһынай хаһаайыстыбанан дьарыктанааччылар, 12 – ИП, 22 – кэтэх хаһаайыстыбалаахтар. Атыы-эргиэн бөһүөлэк спортивнай оскуолатын спортсаалатыгар уонна таһырдьа тэрилиннэ.

СИА корреспонденыгар Кэбээйи улууһугар сири-уоту сайыннарыы боппуруоһугар баһылыгы солбуйааччы Александр Андреев бу курдуккэпсээтэ:

-- Хаһаайыстыбалар сүрүннээн үүт, эт, балык аҕалбыттар. Кэтэх хаһаайыстыбалаахтар, предпринимателлэр бурдук, эт ас арааһын астаабыттар. Арыктаах нэһилиэгэр быйыл тэриллибит Василий Эверстов салайааччылаах “Ньидьили” ХЭУо собону астаан аҕалбыта улахан сэргэхсийиини таһаарда. Ол курдук, собону хатырыктаан, үөһүн ыраастаан пакеттабыттарын, оттон миинин анал иһиккэ куппуттарын улаханнык сонурҕаатылар.

Үгэс курдук болҕомтону тардар куонкурустар тэрилиннилэр. Ол курдук, “Саамай эмис ынах этэ” куонкуруска I Лүүчүн нэһилиэгиттэн кыттыбыт “Күөрэлээх” ТХПК, “Саамай эмис убаһа этэ” “Унаардаах” ТХПК (Мукучу), “Саамай улахан собо” “Күндээдэ” ТХПК (Тыайа) бастаатылар. Бу балык 41 см усталаах, 3 киилэ ыйааһыннаах.

Александр Васильевич эппитинэн, куонкурус кыайыылаахтарыгар сыаналаах бириистэр туттарыллыбыттар. Дьаарбаҥкаҕа сылдьыбыт дьон ас-үөл арааһа сыллата элбээн, хаачыстыба тупсан иһэрин бэлиэтээбиттэр, тэрийээччилэргэ махтаммыттар.