Бу туох туһунан кинигэлэрий диэн ыйытар буоллахха, маннык:

Саха омук сиэдэрэй, уран оҥоһуктарын киэҥ эйгэҕэ таһааран көрдөрөр, кэрэһилээн кэпсиир «Саха эйгэтэ: норуот айымньыта» диэн халыҥ, сонун альбом үс тылынан: сахалыы, нууччалыы, английскайдыы таҕыста. Бу улахан бырайыагы иилээн-саҕалаан «Бичик» редакциятын уопуттаах сэбиэдиссэйэ, СР үөрэҕин үтүөлээх үлэһитэ Розалия Петровна Осипова олоххо киллэрдэ. Кини музейдары кытта ыкса үлэтин түмүгэр, кинигэ ааптардара культурология кандидата С.В. Никифорова, искусствоведения кандидата И.В. Покатилова күүстэрин түмэн, норуот үйэлээх айымньыларын арыйар, элбэх хаартыскалардаах альбому кэнэҕэс көлүөнэҕэ тиэрдэргэ улахан үлэни оҥордулар.

Кинигэ боруонса үйэтинээҕи өбүгэлэрбит Өлүөнэ очуоһугар хаалларбыт суруктарыттан саҕалаан, саха сайдам санаатынан үйэлэр тухары айан-тутан таһаарбыт уран оҥоһуктарын сааһылаан кэпсиир, оһуор-мандар туох ис хоһооннооҕун арыйар. Ааҕааччы былыргы балаҕантан сиэттэрэн, удьуор утумун салгыыр уустар үлэлэрин, туос иһити, туттар тэрили, дьахтар киэргэлин, дьэрэкээн таҥаһын, ат симэҕин, мас, муос, тимир, көмүс оҥоһуктары, саха быһаҕын о.д.а. кэрэхсии көрүөҕэ.

Культурнай, спортивнай тэрээһиннэргэ ыраахтан кэлбит ыалдьыттарга тугу бэлэхтиибитий диэн улахан толкуйга түһээччилэр. Итиниэхэ үс тылынан суруллубут саха сиэдэрэй эйгэтин арыйар, уран оҥоһуктарын көрдөрөр альбому бэлэх оҥорон, киэҥ эйгэҕэ таһаарарга тоҕоостоох кэм көһүннэ!

Сахаҕа туох барыта төгүрүк: алааспыт, күөлбүт, сандалыбыт, алаадьыбыт. Онон, «Бичик» кинигэ кыһата айылҕа дьикти күүһүн арыйар кистэлэҥнээх, ымыылаах салгын куттаах, мутукча мүөтүнэн дыргыйар «Эдьиий» диэн ураты кинигэни таһаарда. Олох араас түгэнигэр сиэри-туому хайдах тутуһары 4 дьоҕус сүбэ кинигэлэриттэн билиэххит. Эдьиий үбүлүөйдээх бүлүүһэтэ үтүө санааны үксэтиэ, арчылаах күлүүһүнньүгэ алаһа дьиэҕитин араҥаччылыа, алгыстаах харысхала ис туруккутун күүһүрдүө. Бу ураты кинигэ бүтүөн иннинэ атыылаһарга тиэтэйиҥ!

«Иллюстрированный атлас Республики Саха (Якутия)» элбэх хаартыскалардаах, Сахабыт сирин кэрэ айылҕатын, көтөрдөрүн, кыылларын арыйар альбом хас биирдии улуус уратытын, тулалыыр эйгэтин, нэһилиэнньэтэ туох-ханнык дьарыктааҕын кэпсиир.

Онон, бу үс бэртээхэй кинигэни кууһунан атыылаһан, үрүҥ көмүс сувенирнай чороон сүүйэн ылыҥ!