Роналду бу үһүс «Кыһыл көмүс мээчигэ». Бу иннинэ 2008 уонна 2013 сыллардаахха эмиэ сыл чулуу футболиһынан билиниллибитэ. Ааспыт сылга «Реал» Чемпионнар лигаларын, кулууптар аан дойдутааҕы чемпионаттарын кыайыылааҕынан буолбута, Испания Кубогын, УЕФА Суперкубогын ылбыта. Сыл иһигэр португалец кулуубун иһин уонна дойдутун сүүмэрдэммит хамаандатыгар 62 оонньообута, онно 61 голу киллэрбитэ.

Кинини сэргэ бочуоттаах бириис иһин күрэс финалистарынан «Бавария» уонна Германия сүүмэрдэммит хамаандатын вратара Мануэль Нойер уонна «Барселона» уонна Аргентина сүүмэрдэммит хамаандатын форварда Лионель Месси буоллулар.

Санатар буоллахха, «Кыһыл көмүс мээчик» - 2010 сылтан ФИФА уонна France Football холбоһуктаах наҕараадаларынан буолар. Бу иннинэ футбол аан дойдутааҕы федерацията «ФИФА бастыҥ футболиһа», оттон France Football «Кыһыл көмүс мээчик» бириистэри туруораллара. Сыл чулуу футболиһын быһаарыыга бары дойдулар сүүмэрдэммит хамаандаларын тренердэрэ, капитаннара уонна суруналыыстар кытталлар.