Судаарыстыбаннай сүбэһит Андрей Борисов этэринэн, бу Олоҥхо театра төрүттэммитэ биэс эрэ сыл буолла эрээри, номнуо аар-саарга аатырда. Онон бэйэтэ туспа дьиэлэнэригэр уолдьаста. 

«Удаҕан кыргыттар» испэктээкил режиссера Степанида Борисова бэйэтэ «Кыһыл көмүс мааскаҕа» кыттарыттан олох долгуйбат, арай, үөрэтэр оҕолоро үөрэллэриттэн сүрдээҕин астынарын иһитиннэрдэ. Бу испэктээкилгэ Арктикаҕатааҕы культура уонна искусство институтун устудьуоннара уонна выпускниктара оонньууллар. Сүрүн оруолу – Уолумар удаҕаны оонньуур Ньургуйаана Маркова  бу бастакы оруола улахан бириэмийэҕэ турбутуттан олус үөрэрин уонна долгуйарын туһунан этэр. Оруолга киирэр туһуттан Ньургуйаана кылыһахтаах ырыаҕа уонна сценаҕа кыырарга үөрэммит.