Бүлүү улууһугар бастыҥ нэһилиэктэри быһаардылар

Ааспыт сылга Россия үрдүнэн Культура сыла биллэриллэн сир-сир аайы үгүс үлэ ыытылынна. Улууска ыытыллыбыт “Сайдыы, түмсүү бастыҥ түөлбэтэ” диэн нэһилиэктэр икки ардыларынааҕы фестивальга бары нэһилиэктэр көхтөөхтүк кытыннылар.


Манна аҥардас концерт эрэ нүөмэрдэринэн буолбакка, спортка, тыа хаһаайыстыбатыгар, үөрэххэ уонна да атын салааларынан куоталастылар. Ахсынньы эргэтигэр сыл устата барбыт тэрээһин түмүгүн таһаардылар. Бу күн бастыҥнар ааттаннылар, наҕараадалар туттарылыннылар.
Түмүккэ үһүс миэстэни Лөкөчөөн нэһилиэгэ (баһылык А.В.Доргонова) ылла уонна 200 тыһыынча солкуобайынан биһирэннэ.
Иккис миэстэни Чинэкэ нэһилиэгэ (баһылык А.В.Протапопов) 300 тыһыынчанан бириэмийэлэннэ.
Бастакы бочуоттаах миэстэни, быйылгы сыл саамай түмсүүлээх, бастыҥ көрдөрүүлээх нэһилиэк аатын – Дьөккөн нэһилиэгэ ылла (баһылык А.И.Ионова) уонна улуус баһылыга Сергей Винокуров туруорбут сүрүн бирииһинэн - УАЗ микроавтобус массыынанан наҕараадаланна.