Оҕолор хайдах күрэхтэспиттэрин туһунан Булгунньахтаах орто оскуолатын физкультураҕа учуутала Екатерина Егороваттан ыйыталастым.

- Волейбол биһиги улууспутугар сылтан сыл сайдан иһэр. Оскуола оҕолорун ортолоругар тохсунньу 20 күнүгэр улуус үөрэнээччилэрин спартакиадаларын чэрчитинэн 13 хамаанда кыттыылаах күрэхтэһии буолбута. Манна бастакы миэстэни Хачыкаат орто оскуолата ылбыта (тренер Ефимов П.П.), иккискэ Булгунньахтаах орто оскуолата (тренер Егорова Е.Е.), үһүскэ Өктөмнөөҕү лицей (тренер Бурнашев Ф.Ф.) таҕыстылар. Уолаттарга 14 хамаанда күрэхтэспититтэн бастакы миэстэни Булгунньахтаах орто оскуолата (тренер Егорова Е.Е.), иккиһи өктөмнөөҕү лицей (тренер Бурнашев Ф.Ф.) уонна үһүс миэстэни Хачыкаат орто оскуолата (тренер Ефимов П.П.) ылбыттара. Оскуола оҕолоругар кэлиҥҥи кэмҥэ Мохсоҕоллоох уонна II Малдьаҕар орто оскуолаларын үөрэнээччилэрин оонньуур таһымнара биллэ үрдээбит, - диэтэ спорт бэтэрээнэ Екатерина Егоровна.

- Волейбол ким баҕарар оонньуон сөптөөх спорт көрүҥнэриттэн биирдэстэрэ. Маннык дьон маассабайдык кыттар күрэхтэһиитин сылын ахсын ыытар буолуохпут. Олунньуга волейболга өрөспүүбүлүкэ чемпионата буолуохтаах, онно хамаандабытын сүүмэрдээн бэлэмниэхпит, - диэтэ улуус спорка кэмитиэтин бэрэссэдээтэлэ Юрий Никифоров.

Күрэхтэһиилэр Покровскай куорат Спордун дыбарыаһыгар, Зверофема култуурунай-спортивнай киинигэр, Мохсоҕоллооххо "Цементник" уонна II Дьөппөн нэһилиэгин спортивнай саалаларыгар тэҥинэн ыытылыннылар.

Икки күннээх күрэхтэһиилэр түмүктэринэн бастакы миэстэни Булгунньахтаах хамаандата, иккискэ Покровскай куорат уонна үһүс миэстэҕэ Улахан Аан волейболистара таҕыстылар. Өрөспүүбүлүкэ үрдүнэн ыытылла турар Волейбол күнүн чэрчитинэн ыытыллыбыт күрэхтэһии  чулууларынан ааттаатылар:

"Бастыҥ оонньооччу" номинация хаһаайыттарынан Михайлов Алеша (Булгунньахтаах) уонна Ефремова Диана (Хачыкаат) буоллулар. "Кэскиллээх оонньооччу" ааттары Иванов Проня (Өктөмнөөҕү лицей) уонна Данилова Алена (Булгунньахтаах) ыллылар. Сүрүн састаапка эр дьоҥҥо "Бастыҥ быһааччы" номинацияны Тимур Прохоров (Покровскай), бэтэрээннэргэ Игорь Кошкин (Мохсоҕоллоох), дьахталларга Саргылаана Михайлова (Булгунньахтаах), бэтэрээннэргэ Анисия Макарова (Булгунньахтаах) буоллулар. Оттон "Бастыҥ көмүскээччигэ" бириис эр дьоҥҥо Петр Трофимовка (Улахан Аан), бэтэрээннэргэ Андрей Дягилевка (Покровскай), дьахталларга Вилюяна Ильинаҕа (Төхтүр), бэтэрээннэргэ Оксана Апросимоваҕа (Улахан Аан) туттарылынна. Маны таһынан, "Бастыҥ ситимнээччи" номинация хаһаайыттарынан Виталий Гаврильев (Улахан Аан), бэтэрээннэргэ Никифор Яковлев (Улахан Аан), дьахталларга Наталья Герасимова (Покровскай), бэтэрээннэргэ Варвара Соломонова (Покровскай) буоллулар.

Дьэ, ити курдук, улууспутугар муниципальнай тэриллиилэр икки ардыларыгар волейболга күрэхтэһии бэрт тэрээһиннээхтик ыытылынна.