Тигинэччи оттуллубут көмүлүөгү тула оройуон сээркээн сэһэнньиттэрэ, уран тыллаах ытык дьон түмсэн истээччилэрин кэрэ кэпсээнинэн күндүлээтилэр. Түмүк нэһилиэгиттэн Виссарион Акимович Гаврильев, Анна Прокопьевна Абишева, Дария Андреевна Еттянова, Валентина Васильевна Егорова, Чаппандаттан Татьяна Дмитриевна Сидорова, Күндээдэттэн Петр Тимофеевич Иванов, Хатыҥ Сыһыыттан Василий Иванович Иванов-Чиллэ Баһылай, Ньурба куоратыттан Евдокия Прокопьевна Улинова хоммут уостарын хоҥнорон, өрөөбүт уостарын өһүлэн үһүйээн, номох, остуоруйа арааһын тоҕо тартылар. Оттон истээччилэр бэркэ сэҥээрэн, сэргээн, сүргэлэрэ көтөҕүллэн сэһэн-сэппэн биир тылын сыыска-буорга түһэрбэккэ иһиттилэр.

-- Бастакы тэрээһиммит болҕомтону улаханнык тарта. Аҕам саастаах дьон ыҥырыллан суолу ыччаттарыгар тэлэн биэрдилэр диэн сүгүрүйэн этэбин. Саамай кырдьаҕас кыттааччыбыт 83 саастаах Виссарион Гаврильев эдэрдэргэ бэйэтин кэпсээнин иһитиннэрээри Түмүктэн айаннаан кэлбитэ. Икки киэһэ устатыгар уопсайа сүүстэн тахса истээччи сырытта. Бу түһүлгэбит хас ый ахсын салҕанар, сыл устата ыытыллар. Онно саҥаттан-саҥа устар ууну сомоҕолуур уран тыллаахтар кыттан иһиэхтэрэ. Кинилэр эппиттэрэ-тыыммыттараанал фондаҕа киллэриллэн үйэтитиллиэҕэ. Маныаха биһиги ытык киһибит, Ньурба оройуонун бочуоттаах олохтооҕо, СР культуратын үтүөлээх үлэһитэ, фольклорист Владимир Семенович Лосотов салайар “Талаан” фольклорга студията оройуон киинигэр кыайан кэлбэт уран тыллаах кырдьаҕастарбытын нэһилиэктэринэн сылдьан устан үйэтитиэҕэ. Бу кэлэр көлүөнэҕэ хаалларар сүдү бэлэхпит буолуоҕа. Итини сэргэ сылын ахсын түһүлгэ түмүгүнэн кинигэ оҥорор баҕалаахпыт, -- диир улуустааҕы культура управлениетын норуот отделын испэсэлииһэ Иван Попов. Кини бэлиэтииринэн, олунньутааҕы түһүлгэҕэ биэс киһи кэлэр баҕалааҕын биллэрбит. Маныаха улуус киэн туттар киһитэ, кыраайы үөрэтээччи Ахмед Андреевич Дмитриев ыҥырыылаах ыалдьыт быһыытынан кэлэн кыттарын туһунан Иван Иванович киэн туттан, үөрэн бэлиэтиир.

Ураты түһүлгэҕэ өйөбүл буолбут «Кыталык» культура дыбарыаһын коллективыгар, салайааччытыгар СР культуратын туйгунугар Арсен Петровка, Ньурба 1 №-дээх оскуолатын үѳрэнээччилэригэр (салайааччы Тамара Петрова), «Ньурба уоттара» литературнай түмсүүгэ, Октябрьскай нэһилиэк уонна куорат эбээлэрин түмсүүлэригэр, «Дабайа» ансаамбылга (салайааччы СР культуратын туйгунаСветлана Алексеева), “Аман өс” уран тыл күрэһигэр кытта кэлбит үөрэнээччилэргэ о.д а. махтаналлар.Кэлэр да өттүгэр бу курдук кытталларыгар, өйөбүл буолалларыгар баҕараллар.