Олунньу 6 күнүгэр үгэскэ кубулуйбут Ларионовскай баал буолла. Киэргэммит-симэммит эдэркээн кыргыттар, уолаттар саалаҕа толору мустаннар, дьиҥ-чахчы XIX үйэтээҕи баалга сылдьыбыт курдук хатыламмат түгэни бэлэхтээтилэр.

Бу күн оскуола попечителлэрэ ыалдьыттаатылар. Директор Светлана Игнатьева сыллата попечителлэрбит ахсааннара элбээн иһэллэр диэтэ итиэннэ саҥа попечиттеллэргэ: «Медлайн» чэбдигирдэр-диагностыыр киин директорыгар Изабелла Белолюбскаяҕа, улуустааҕы киин библиотека директорыгар Елизавета Корниловаҕа, «Чолбон» бассейн директорыгар Семен Говоровка дастабырыанньалары үөрүүлээх быһыыга-майгыга туттартаата. Попечителлэр ааттарыттан эҕэрдэни улуустааҕы «Ытык сүбэ» сэбиэтин бэрэссэдээтэлэ Василий Эверстов эттэ.

2014 сыл түмүгүнэн «Бастыҥ үөрэнээччи» ааты сүгэр чиэс Евдоким Афанасьевка, Андрей Антоновка (9 «а» кылаас), Настя Бурнашеваҕа (10 «а») уонна Саргы Колосоваҕа (11 «а») тигистэ. «Бастыҥ активист-общественник» аат 11 «а» кылаас үөрэнээччилэригэр Катя Прокопьеваҕа, Эдита Слепцоваҕа уонна Алена Тимофееваҕа иҥэрилиннилэр. «Бастыҥ спортсмен» аатын Миша Куприянов (10 «а»), Павел Попов (9 «а») уонна Саша Иванов (11 «а») сүктүлэр.

Ларионовскай баал Литература сыла биллэриллибитинэн хоһоон ааҕыытынан, Лев Толстой «Война и мир» айымньытыттан быһа тардыынан, Саша Мучина уонна Коля Соловьев вальстааһыннарыттан саҕаланна. Ол кэннэ оскуоланы бүтэрбит Дьокуускайдааҕы культура колледжын устудьуона Сергей Павлов танцмейстердаан саалаҕа мустубут үөрэнээччилэр полонез, па де патинер, падеграс, котильон курдук кэрэ үҥкүүлэри үҥкүүлээн көрдөрдүлэр. Баалга учууталлар, попечителлэр, «Кыталык» ансаамбыл иһинэн үлэлиир аҕа көлүөнэ үҥкүүһүттэрэ, «Аҕа дойдуну көмүскээччилэр» кулууп иитиллээччилэрэ бука бары вальстаан тэлээрдилэр.