Ааспыт өрөбүлгэ Майаҕа Комсомольскай болуоссакка Майа орто оскуолатын араас сылларга бүтэрбиттэр тэлгэһэ хоккейыгар үгэс буолбут табаарыстыы күрэхтэһиилэрэ буолла.

Күрэхтэһии Майа орто оскуолатын 1981 с. бүтэрбит биир бастыҥ үөрэнээччи, общественник, оскуола попечителэ, республикаҕа биллэр предприниматель буола үүммүт Александр Ларионов кэриэһигэр ыытыллар. Александр үөлээннээхтэрин ортотугар кэккэ сылларга хоккейга уонна футболга күрэхтэһиилэри тэрийбитэ. Онон бииргэ үөрэммит доҕотторо кини аатын ааттатар, үйэтитэр инниттэн маннык тэрээһини сыллата ыыталлар.

Күрэхтэһиигэ оскуоланы 1978-1979, 1981, 1982, 1983 сс. бүтэрбиттэр түөрт хамаанданы туруоран кытыннылар. Бэрт эрийсиилээх, хатыһыылаах түмүк оонньууга 1978-1979 сс. выпускниктар Александр Ларионов бииргэ үөрэммит доҕотторун 4:3 ахсаанынан хотон иккис төгүлүн күрэхтэһии кыайыылааҕынан буоллулар. Кинилэр көһөрүллэ сыдьар кубок, диплом хаһаайыннарынан буоллулар.

Александр күн-күбэй ийэтэ, Майаҕа олох-дьаһах комбинатыгар өр сылларга иистэнньэҥинэн үтүө суобастаахтык үлэлээбит үлэ ветерана Октябрина Федорова кыайыылаах уонна бириистээх миэстэлэргэ итиэннэ төрдүс миэстэҕэ тиксибит хамаандаларга тус бэйэтин, Александр бииргэ төрөөбүттэрин, оҕолорун, сиэннэрин ааттарыттан харчынан бириэмийэлэри туттартаата. Майа орто оскуолатын директоры үөрэх чааһыгар солбуйааччы Изабелла Шарина Октябрина Афанасьевнаҕа оскуола салалтатын аатыттан Махтал суругу, Александр бииргэ үөрэммит оҕолоро тыыннаах сибэкки дьөрбөтүн туттардылар.

- Оҕобун доҕотторо маннык аатын ааттаан, үйэтитэн, кэриэстээн хоккейга саас аайы күрэхтэһии тэрийэллэриттэн наһаа долгуйабын уонна кинилэргэ истиҥник махтанабын, - диир Октябрина Афанасьевна. – Бары Майаҕа бииргэ улааппыт, биир оскуолаҕа үөрэммит дьон буолан түмсүүлээхтэр. Күннээҕи түбүктэн сынньана таарыйа оҕо саастарын эргитэн сибиэһэй салгыҥҥа дуоһуйа оонньууллара үчүгэй бөҕө буоллаҕа дии. Инникитин да маннык күрэхтэһии салҕанан барарыгар баҕа санаабын тиэрдэбин.

Ити курдук, кыттааччылар да, тэрийээччилэр да көлүөнэ үтүө үгэһэ салҕана турарыгар, инникитин кыттааччылар ахсааннара эбиллэригэр салгыы үлэлэһэр соруктаах тарҕастылар.