Күрэс бастакы чааһыгар Афанасьев А.Е., Спиридонова Б.Д., Андросова С.Г., ЧеремкинаВ.А. ийэтинээн К.В. Находкиналыын, Толбонов Г.С., Андросов К.А., Токуев А.М. уонна Говоров Г.Г. олус үчүгэйдик бэлэмнэнэн, санаабыт санааларын сааһылаан сайа этэн, тиэмэлэрин толору арыйдылар.

Дьүүллүүр сүбэ биэс кыттааччыны чорботон, түмүктүүр түһүмэххэ таһаарда: Толбонов Г.С., Спиридонова Б.Д., Андросов К.А., Андросова С.Г., Токуев А.М. Салгыы кыттааччылар саха киһитин туттар тэрилин, аһын-үөлүн тута хоһуйан дьүһүйдүлэр. Манна дьиҥ-чахчы хомоҕой тыллаах, ийэ тыл сүмэтин этигэр-хааныгар иҥэринэн илдьэ сылдьар киһинэн Толбонов Г.С. буолла, бары кыттааччылартан ордук чорбойон таҕыста. Уонна дьүүллүүр сүбэ быһаарыытынан, «Баай уус-уран тыллаах» анал ааты сүктэ. «Кэскиллээх бөлүһүөк» ааты – Токуев А.М. ылла, «Хомоҕой тыллааҕынан» Андросов К.А. буолла. Бары кыттааччылар туоһу суруктары, сэмэй бэлэхтэри туттулар. Оттон Сааскылаах нэһилиэгин дьаһалтата туруорбут «Көрөөччү биһирэбилэ» бирииһи Уус-Алдантан төрүттээх, Анаабырга ыалдьыттыы кэлэ сылдьар тыыл бэтэрээнигэр К.В. Находкинаҕа «Сэрии оҕолоро» диэн тиэмэҕэ бэйэтин олоҕун туһунан олус интэриэһинэй кэпсээнин иһин биир сүбэнэн үөрэ-көтө туттардылар.

Тэрээһин иккис чааһа киэһэ 7 чаастан саҕаланна. Онно «Хоту дойдубун туойабын» диэн тиэмэҕэ инсценировканы, театрализованнай дьүһүйүүнү көрдөрдүлэр.

Тэрээһини М.П. Решетникова аатынан норуот театрын режиссера А.С. Молонова иилээн-саҕалаан ыытта. Бу түһүмэххэ 4 хамаанда кытынна. Бастакынан эдэр ийэлэр түмсүүлэрэ тахсан олохтоох автордар хоһоонноругар литературнай дьүһүйүүнү көрдөрдө. «Элдээнэ» ансаамбыл айар бөлөҕө «Огуруо бытык» инсценировканан көрөөччүлэри сэргэхситтилэр. Салгыы улуус дьаһалтатын айар бөлөҕө Иван Гоголев «Аал уот» хотугу номоҕуттан быһа тардыыны, Сааскылаах орто сокуолатын үөрэнээччилэрэ Петр Тобуруокап хоһооннорунан уус-уран дьүһүйүүнү көрдөрөн дьон сүрэҕин кылын таарыйдылар.

Дьүүллүүр сүбэ быһаарыытынан бастакы миэстэни Сааскылаах орто оскуолатын үөрэнээччилэрэ, иккиһи улуус дьаһалтатын айар бөлөҕө, үсүһү «Элдээнэ» ансаамбыл айар бөлөҕө ыллылар. Күрэс олус тэрээһиннээхтик, хаһааҥҥытааҕар даҕаны сонуннук ааста.