Куонкуруска куорат уокуруктарыттан, таһынааҕы бөһүөлэктэртэн, улуустартан иккилии киһилээх 16 хамаанда кытынна. Эр киһи -- балык кыһар, дьахтар ылан бүлүүдэҕэ кыраһыабай көстүүлээх буоларын курдук өрөһөлөөн иһэр. Ол эрээри, сорох хамаандаларга төттөрүтүн дьахтар тоҥ балыгы кыһар, эр киһи бүлүүдэҕэ уурталыыр. Кыстаммыт "тутуу" тардыллан турар кыһыл лиэнтэҕэ тиийдэҕинэ, үлэ тохтотуллар.  Дьүүллүүр сүбэ түргэн, сымса туттууну-хаптыыны, үлэ хаачыстыбалаахтык толоруллуутун уонна кыһыллыбыт балык бүлүүдэҕэ төһө кыраһыабайдык өрөһөлөммүтүн сыаналаата.

Бастакы күрэстэһиигэ Сайсары уокуруктан Эверствотар, Автодорожнай уокуруктан уонна Тулагы бөһүөлэгиттэн кыттыбыт хамаандалар финалга киирдилэр.
Иккискэ үп-экономическай институт остолобуойун хамаандата, Хатас сэлиэнньэтиттэн уонна Русскай Устьеттан төрүттээхтэр тэрийбит общественнай тэрилтэлэрин хамаандалара кыайыылааҕынан таҕыстылар.
Манна даҕатан эттэххэ, тулагылар төрдүс сылларын кытталлар. Былырыын иккис миэстэни ылбыт буоланнар, быйыл бастыыр сыаллаахтар-соруктаахтар. Туттар малларын-салларын кичэйбиттэр.Сып-сытыы саха быһахтаахтар, кыһарга балык халтарыйбатын диэн төбөтүн кыбытан кэбиһэр анал хайаҕастаах дуоскалаахтар. Бары кыттааччылар эрдэттэн бэлэмнэммит буоланнар, күрэхтэһии сытыытык, өрө күүрүүлээхтик барда.

Хас биирдии хамаанда тиритэ-хорута киирсибитин түмүгэр, түргэн-тарҕан туттунуулаах хатастар "За скорость" номинацияны ыллылар. Кинилэргэ балыгы дьахтар кыспыта, эр киһи бүлүүдэҕэ кыстаан испитэ. "За качество" номинацияҕа  русскай-устьелартан тэриллибит общественнай тэрилтэ тигистэ. "Дьиэтээҕи сорудаҕы" үчүгэйдик толоруу иһин Марха микро-оройуонун дьоно наҕараадаланна. "Индустрия спецодежды" маҕаһыын анал бирииһин Михайловтар (ФЭИ остолобуойа) ыллылар.
Саамай долгутуулаах түгэҥҥэ, дохсун ытыс тыаһыгар доҕуһуоллатан уонна "Ураа!" хаһыынан арыаллатан Гран-при Сайсары уокуругуттан кыттыбыт Анна уонна Петр Эверстовтарга туттарылынна. Кубогы уонна 25 тыһыынчалаах сертификаты туппут дьиэ кэргэн аҕа баһылыга Петр Эверстов үөрүүтүн үллэһиннэ. "Куонкуруска бастакы кыттыыбыт. Мин - Чурапчыбын. Кэргэним Анна Васильевна - Орто Халыма. Онон кини балыгы оҕо эрдэҕиттэн кыһа, тоҥтон бүлүүдэ арааһын бэлэмнии үөрүйэх", - диэтэ кини үөрэ-көтө.

Дьүүллүүр сүбэ бэрэссэдээтэлэ Борис Николаев куонкуруска  улуустар үксээн, кыттааччылар сатабыллара үрдээн иһэрин бэлиэтээтэ.
Сынньалаҥҥа көрөөччүлэргэ анаан ыытыллыбыт собону түргэнник сиэһиҥҥэ уонна биир иһиттэн иккис иһиккэ таһыыга күрэхтэһиигэ, эр дьон тоҕо эрэ кыттыбатаҕын үрдүнэн,  олус көхтөөхтүк ааста. Илин-кэлин түсүһүү түмүгэр Галина Дмитриева барыларыттан чорбойон, кыайыылаҕынан буолла.
Далааһыннаах тэрээһини "Эхо тундры и тайги" ырыа куонкуруһун лауреаттара уонна дипломаннара киэргэттилэр. Оттон көрөөччүлэр минньигэс тоҥ балыгы амсайан үөрэн, астынан тарҕастылар.