Дьокуускайга номох буолбут «Спартак» балет генеральнай репетицията буолла

Бэҕэһээ, сэтинньи 19 күнүгэр, Дьокуускайга Суорун Омоллоон аатынан Опера уонна балет театрыгар Арам Хачатурян муусукатыгар Юрий Григорович туруоруутунан «Спартак» балет генеральнай репетицията буолла.

Сценаҕа тахсыбыт балет артыыстарын уонна Аксинья, Наталья Посельскаялар ааттарынан өрөспүүбүлүкэтээҕи хореографическай училище үрдүкү курстарын үөрэнээччилэрин долгуйууларын өйдүөххэ сөп – «Спартак» ааптара, аар-саарга аатырбыт хореограф Юрий Николаевич Григорович соҕурууттан анаан-минээн кэлэн кинилэр хас да ыйдаах сыралаах үлэлэрин түмүгүн сыаналаата.

Биллиилээх балетмейстер биһиги театрбытын кытта ыкса сибээстээхтик үлэлээбитэ уонтан тахса сыл буолла. «Спартак» балет – Социалистическай Үлэ Геройа, Ленинскэй, ССРС Государственнай бириэмийэлэр лауреаттара Дьокуускайга үһүс туруоруута. Бу иннинэ Юрий Николаевич «Лебединая озеро» (1999 с.), «Ромео и Джульетта» (2004 с.) балеттарын саха көрөөччүтэ иһирэхтик ылыммыта.

Репетиция кэнниттэн Россия, Саха сирин үтүөлээх артыыһа Афанасий Афанасьев СИА корреспонденын кытта санаатын үллэһиннэ. Кини оҕо сылдьан «Спартак» балекка Улахан театрга сылдьыбытын, Владимир Васильев, Марис Лиепа үҥкүүлэрин сөҕө-махтайа көрбүтүн эттэ. «Бүгүн сүрүн партиялары толорбут Сарыал Афанасьевы (Спартак), Юлия Мяринаны (Фригия), Ринат Хону (Красс) сэргэ кордебалеты чорботон бэлиэтиэм этэ. Улахан үлэ барбыта харахха тута быраҕыллар. Культура сылыгар Опера уонна балет театра, Аксинья, Наталья Посельскаялар ааттарынан өрөспүүбүлүкэтээҕи хореографическай училище киин куорат олохтоохторугар, ыалдьыттарыгар сүүнэ бэлэҕи ууннулар. Ол иһин кинилэргэ махтаныаҕыҥ! «Спартак» балет Дьокуускайга туруоруллуута – саха балетын искусствотын биир чаҕылхай ситиһиитинэн буолуоҕар саарбахтаабаппын», - диэтэ кини.