Күрэхтэһиини Сангаар гимназията, СӨ Байыаннай комиссариатын Кэбээйи улууһунааҕы отдела уонна оҕо спортивнай оскуолата тэрийэн ыыттылар. Манна Куокуй, Кальвица, Сангаар оскуолаларыттан 5 хамаанда күрэхтэстэ.Сангаар гимназията икки хамаанданы туруорбута. Барыта 50-ча киһи кытынна. Суол суох буолан сорох оскуолалар кыайан кыттыбатылар.

Тыҥааһыннаах күрэхтэһиилэр түмүктэригэр бэйэлэрин бөлөхтөрүгэр бастакы миэстэни ыллылар: Сергей Тукачев (1 №-дээх Сангаар орто оскуолата), Дуня Спиридонова (Сангаар гимназията), Василий Гуляев (Куокуй оскуолата), Лена Цветкова (Сангаар 1 №-дээх орто оскуолата).

Улахан дьоҥҥо бастаатылар: С.В.Варфоломеев (Сангаар гимназията), Е.Б. Шурупова (1 №-дээх Сангаар орто оскуолата).

Хамаанданан түмүккэ бастакы миэстэни Сангаар гимназиятын хамаандата ылла (213 очколаах). Иккискэ - 1 №-дээх Сангаар орто оскуолата (157 очколаах), үһүскэ – Куокуй оскуолата (143 очколаах) таҕыстылар. Бириистээх миэстэлэргэ тиксибит хамаандалар кубоктарынан, дипломнарынан уонна салгын сааларынан, кыттыылаахтар – мэтээллэринэн, дипломнарынан уонна сыаналаах бириистэринэн наҕараадаланнылар.

Кыайыылаахтары «Өркөн» вокальнай ансаамбыл кыра уонна улахан бөлөхтөрө өссө төгүл эҕэрдэлээтилэр. Күрэхтэһии үрдүк таһымнаахтык ааста.

Күрэхтэһиини ыытыыга бэтэрээн аймахтара - Сангаарга олорор уола, пенсионер Обутов С.Е., сиэннэрэ Л.А. Нектегяева, С.Е. Потапова, У.Е. Обутова, хос сиэнэ А.Г. Нектегяева, Кэбээйиттэн сиэннэрэ Е.Е. Обутов, П.Е. Андреева, Дьокуускайтан С.А. Ермолаева - көмөлөстүлэр.

Өлбөт-сүппэт хорсун быһыыны оҥорбут уонна үрдүк наҕараадаларынан бэлиэтэммит Кэбээйи саллааттарын ортолоругар Егор Семенович Обутов аата биир бастакынан ааттанар.

Сэрии бэтэрээнэ Егор Семенович Обутов

1916 сыллаахха Кэбээйи сэлиэнньэтигэр төрөөбүтэ. Кэбээйи оскуолатыгар үөрэммитэ. Колхуоска, кэлин Сангаар шахтатыгар үлэлээбитэ. 1942 сыллаахха Кыһыл Аармыйа кэккэтигэр ыҥырыллыбыта.102 стрелковай полкаҕа пулеметчигынан сулууспалаабыта.

1943 с. Ленинград куораты көмүскээһиҥҥэ кыттыбыта. Бааһыран, госпитальга сытан эмтэммитэ. Сэрииттэн этэҥҥэ эргиллэн кэлэн уһун сыллар усталарыгар төрөөбүт Кэбээйитигэр үлэлээбитэ. Сэриигэ “Хорсунун иһин”, 3 истиэпэннээх Албан Аат уордьанынан , “Ленинград оборонатын иһин”, “Германияны кыайыы иһин” мэтээллэринэн наҕараадаламмыта. ССРС оборонатын миниистирэ, Сэбиэскэй Сойуус маршала А.А. Гречко илии баттааһыннаах бырабыыталыстыбаннай наҕараадалаах. Эйэлээх кэмҥэ «Үлэҕэ килбиэнин иһин», «Үлэ бэтэрээнэ» мэтээллэринэн наҕараадаламмыта.