РФ ИДьМ-тын СӨ ИДьМ-тын пресс-сулууспата: 

- Бу дьыл олунньу 7 күнүгэр, түүн 23.00 чаас саҕана Горнайдааҕы полиция дьуһуурунай чааһыгар иһитиннэрии киирбит. Ааһыма уонна Бэрдьигэстээх сэлиэнньэлэрин икки ардыларынааҕы суолга киһи эмсэҕэлээһиннээх быһылаан тахсыбытын туһунан.

Быһылаан буолбут сиригэр тиийбит суһал-силиэстийэлиир бөлөх быһаарбытынан, «Тойота Ланд Крузер» массыына 44 саастаах суоппара Дьокуускай куоракка айаннаан иһэн, “УАЗ” массыынаны саайбыт. “УАЗ” кини ааһар сиринэн, суол кытыытыгар алдьанан турбут. Оттон “УАЗ” иннигэр 29 саастаах киһи буксировочнай торуоһу иилэ турбут. Онуоха джип “уазигы” саайбыт күүһүттэн, массыына ол киһи үрдүнэн барбыт. Ылбыт эчэйиилэриттэн эдэр киһи сырдык тыына аара суолга быстыбыт.  

Барыллаан быһаарыынан, “УАЗ” аварийнай уоттара холбонон турбуттар, ол эрээри, суоппар аварийнай бэлиэни туруорбатах. Хойуу туман уонна массыына буруота мэһэйдээннэр, «Тойота Ланд Крузер» суоппара аварийнай уоттары хойутаан өйдөөн көрбүт. Массыынаҕа сааллымаары салайбыт да, уҥа өттүнэн “УАЗ” хаҥас, кэлин өттүн таарыйбыт.

Медицинскэй туоһулааһын көрдөрбүтүнэн, джип суоппара арыгы испэтэҕэ биллибит. Билигин бу чахчынан бэрэбиэркэ бара турар.

Эрнст Березкин, “Вилюй” ФКУ начальнигын солбуйааччы, "News.Ykt.Ru" сайтыгар биэрбит комментарийа: 

- Бастатан туран, өлбүт эдэр киһи чугас дьонугар кутурҕаммын тиэрдэбин. Олунньу 9 күнүгэр эрэ Дьокуускайга кэлбитим. Быраабы араҥаччылыыр уорганнар ирдэбиллэрин барытын толорон, сокуонунан көрүллэр силиэстийэлиир дьайыыларга барытыгар кытынным. Билигин бэрэбиэркэ бара турар кэмигэр бу суол быһылаанын сиһилии комментарийдыыры сөбө суоҕунан ааҕабын. Ымпыгар-чымпыгар диэри барытын сиһилии үөрэтэн-көрөн силиэстийэлиэхтэрэ диэн эрэнэбин. Мин көрүүбэр, силиэстийэлиир, техническэй уонна да атын экспертизалар уопсастыба өттүттэн дьайыыта суох ыытыллыахтаахтар. Эдэр киһи, ыал аҕата суорума суолланна, онтон мин туора турар санаам суох.

Өлүөхсүт Петр Иванов чугас дьоно:

- Бу дьыл олунньу 7 күнүгэр, федеральнай суол 219 километрыгар, Горнай улууһун Ааһыма сэлиэнньэтин чайнойун аттыгар, түүн 23.00-23.30 чааска Эрнст Березкин “Ланд Крузер-200” массыынатынан улахан суол быһылаанын таһаарда. Түргэнник айаннаан иһэн, турар массыынаны саайбыт. Ол содулугар төгүрүк тулаайах, ииппит оҕобутун, тапталлаах кэргэммин, 30.05.1985 с. төрүөх Иванов Петр Петровиһы сүтэрдибит. 6 саастаах уолбут, 5 саастаах кыысчааммыт аҕата суох хааллылар.

Биһиги маннык иэдээҥҥэ урут түбэспэтэх буолан, олус хомойобут, абарабыт. Бу ыар содуллаах быһылааны тустаах уорганнар дьиҥнээҕинэн көрөн быһааралларыгар көрдөһөбүт.

Сүтүктээхтэр "Саха сирэ" хаһыакка иһитиннэрбиттэринэн, уолларын олунньу 11 күнүгэр кистээбиттэр. Эрнст Березкин кинилэргэ ити күн сибээскэ тахса сылдьыбыт.

Бүгүҥҥү күннээҕи туругунан, бу суол быһылаанын чахчытынан холуобунай дьыала тэриллэ илик. “Дорожнай-техническэй, онтон да араас экспертизалар түмүктэммиттэрин кэнниттэн дьыала тэриллэрэ-тэриллибэтэ биллиэҕэ” диэн ИДьМпресс-сулууспатыгар эттилэр.