Бу киһини 2012 сыллаахха оҥоһуллубут ыар буруйга – күүһүлээһиҥҥэ -- уорбалаан туппуттара. Уорбаланааччы буруйун билинэн, буруйу оҥорбут сирин ыйан-көрдөрөн, эмсэҕэлээччи кыыс кинини билэн, ол киһи силиэстийэлиир изоляторга хаайыллыбыта.

Маныаха бу буруй оҥоһуллубут быһыыта-майгыта Анастасия Соҥҥа туһуламмыт буруйга маарынныыр бэлиэлэрдээҕинэн, силиэстийэ уорганнара бу киһи А.Сону өлөрүүгэ сыһыаннааҕын-суоҕун бэрэбиэркэлээбиттэрэ. Ол бэрэбиэркэ түмүгүнэн, ити уорбаланааччы Анастасия Сону күүһүлээһиҥҥэ уонна өлөрүүгэ быһаччы сыһыаннааҕын туоһулуур дакаастабыллар булуллубуттара.

Бүгүн Олег Мезрин иһитиннэрбитинэн, уорбаланааччы В.-га официальнай буруйдааһын оҥоһуллубут. Дьыалата кулун тутарга силиэстийэлэнэн бүтэн, буруйданааччы билсибитин кэнниттэн, прокуратураҕа бигэргэтиигэ барыахтаах.