Күүстээх тыалтан "Дьокуускай", "Маҥан" аэропортар үлэлэрэ кэһиллэ сырытта, киин улуустарга сорох нэһилиэнньэлээх пууннар уота суох олордулар. Холобура, Майаҕа күнүс 4 чааска уоту холбуу иликтэрэ, Покровскайга сорох дьиэлэргэ эбиэккэ диэри уот суоҕа. Кубулҕаттаах кулун тутар ый диэн өбүгэлэрбит мээнэҕэ эппэтэхтэр, илэ бодотун көрдөрдө.

Арай Абыйга бүгүн тыаллаах эрээри сылаас күн-дьыл турар. Ону олохтоохтор син биир ситиһиннэриэ, тымныйыа дииллэр. Сотору улахан тыал түһүө диэн сэрэхэдийэллэр.

Муомаҕа бэҕэһээҥҥиттэн тыалырбыт, бүгүн Дьокуускайтан сөмөлүөт көппөтөх. Уоттара эмиэ бара-бара кэлэр.

Ол оннугар Өлөөҥҥө тымныы, тыаллаах күн турар, олохтоохтор отучча кыраадыс баара буолуо дииллэр.

Өймөкөөҥҥө уулларан иһэн, бөөлүүн халыҥнык хаардаабыт. Күнүһүн уонча кыраадыс тымныы этэ.

Бүлүүгэ тыаллаах эрээри, сааскылыы чэмэлкэй күн турар. Кыралаан уулларар.

Күнү-дьылы кэтээн көрөөччүлэр иһитиннэрэллэринэн, сарсын, өйүүн, кулун тутар 27-28 күннэригэр, Халыма-Индигир уонна арҕааҥҥы, соҕурууҥҥу оройуоннарга хаардыа, хотугулуу-илиҥҥи оройуоннарга хотугулуу-арҕааттан сөкүүндэҕэ 16-21 м, Арктика кытылынан сорох сиринэн 25-30 м диэри тыалырыа. Түүнүн 23-28, киин оройуоннарга 15-20 кыраадыска диэри тымныйара күүтүллэр.