Росагролизинг генеральнай директора Валерий Назаров вице-премьер Петр Алексеевтыын көрсүһүүлэригэр хампаанньа республика сүөһүнү иитээччилэрин өйүүр кыахтаах диэн эрэннэрдэ, үрдүк таһаарыылаах племенной сүөһүнү иитээччилэри дьоһуннаахтык бэлэмниир наадалааҕын бэлиэтээтэ.

Саха сирин правительствотын бэрэссэдээтэлэ этэринэн, республика Росагролизинг Дьокуускайга «Сайсары» тыа хаһаайыстыбатын ырыынагын иккис уочаратын тутуутун бырайыагын олоххо киллэриигэ уонна тымнытар уонна да атын оборудованиены атыылаһыыга кыттыһарыгар интэриэстээҕин эттэ.

Валерий Назаров хампаанньа итинник эбийиэктэр ис өттүлэрин хааччыйыыга кыттара суолталааҕын бэлиэтээтэ. «Тыа хаһаайыстыбатын ырыынага – аграрийдар бэйэлэрин бородууксуйаларын атыылыыр площадкалара. Итинник эбийиэктэр фермердэр бэйэлэрин клиеннэрин буолалларыгар саамай табыгастаах миэстэ, ону таһынан лизинг төлөһүүлэрин төннөрөр кыаҕы биэрэр», - диэтэ кини.

Көрсүһүүгэ республика кэккэ оройуоннарыгар улахан квартальнай тутуулар туһунан кэпсэттилэр. Итинэн сибээстээн Саха сирин үлэһиттэригэр анаан Росагролизинг Рязанскай уобаласка олоххо киллэрбит бырайыагар курдук, олорор дьиэлэри туттарыахтарын сөп.

Валерий Назаров Саха сирин правительствотын кытта үлэҕэ эрэ буолбакка, социальнай соруктары быһаарыыга үлээһэр баҕалааҕын эттэ. «Росагролизинг АПК тэрилтэлэрин үлэһиттэрин үлэлиир сирдэриттэн чугас турар толору тупсаҕай дьиэлэринэн хааччыйар туһаайыылаах», - диэн бэлиэтээтэ кини.

Саха сирин Правительствотын бэрэссэдээтэлин солбуйааччы Петр Алексеев массыына-трактор пааркатын сөргүтүүгэ Программа көдьүүһүн үрдүктүк сыаналаата уонна кэлэр сылга онно тыа сирин табаары оҥорон таһаарааччыларын хаттаан кытталларыгар эрэлин биллэрдэ. Валерий Назаров 2014 сыллаахха ити программаны инники күөҥҥэ туһаайарын бэлиэтээтэ. Регион квотатын оҥорууга республика тыатын сирин оҥорон таһаарааччыларын үрдүк төлөһөр таһымнара учуоттаныаҕа.

Көрсүһүү бүтэһигэр Петр Алексеев Росагролизинг баһылыгар республика аграрнай бырайыактарыгар бары өрүттээх көмөтүн иһин махтанна уонна ахсынньы 12-14 күннэригэр ыытыллар регионнар икки ардыларынааҕы Агропромышленнай инвестиционнай форумҥа кыттыыны ыларга ыҥырда, диэн rosagroleasing.ru иһитиннэрэр.