Ааспыт ый бүтүүтэ оробуочай бөлөх докумуон бырайыагын өссө төгүл дьүүллэспиттэрэ. Бөлөх салайааччыта бырабыыталыстыба бэрэссэдээтэлин солбуйааччы Петр Алексеев, оттон миниистир Иван Слепцов – кини солбуйааччыта. Бөлөххө миниистири солбуйааччылар, департаменнар, биэдэмистибэлэр салайааччылара, юстиция госкомитетын, үп министиэристибэтин бэрэстэбиитэллэрэ, Государственнай Мунньах (Ил Түмэн) тыа сиригэр уонна аграрнай политикаҕа сис кэмитиэтин бэрэссэдээтэлэ  Дмитрий Саввин, Амма улууһун баһылыга Александр Артемьев, уо.д.а. киирбиттэрэ.

Сокуону оҥоруу саҕана Россия 70 регионун тыа хаһаайыстыбатын сайыннарыыга анаммыт, майгынныыр сокуону тилэри үөрэппиппит. Регионнар сокуоннара уопсай саба быраҕан көрдөххө, майгыннаһар өрүттэрэ элбэх. Биһиги сокуоммут барыла дириҥник хорутуллан, элбэҕи уонна киэҥи хабан оҥоһулунна. Саамай сүрүн уратыта — производственнай блоктары таһынан социальнай эйгэ, тыа сирин уопсай кыһалҕата, каадырынан хааччыллыы, тыа хаһаайыстыбатын үлэһиттэрэ санитарнай-курортнай эмтэниилэрэ сокуоҥна киирбит. Холобур, социальнай аһылыгы тэрийии. Маны сүрүннүүр, быһаарар ыстатыйаҕа этиллэринэн, социальнай тэрилтэлэр, оскуолалар, оҕо садтара, медицинскэй тэрилтэлэр сыл аайы ахсынньы 25 күнүгэр диэри олохтоох табаары оҥорон таһаарааччылар бородууксуйаларыгар наадыйыыларын уонна былааннарын туһунан ситэриилээх былааска иһитиннэрии оҥоруохтаахтар.

Саҥа сокуон 5 блоктаах, 34 ыстатыйалаах. Бастакы блок – сокуон уопсай балаһыанньата, иккис – аграрнай политиканы олоххо киллэрии. Онтон салгыы блоктар государственнай өйөбүлгэ, былааннааһыҥна уонна олоххо киллэриигэ сыһыаннаахтар. Бүтэһик блокка быһаарыылар киирдилэр.   

Тыа хаһаайыстыбатыгар анаммыт быраҕыллыбыт сирдэри үллэрии уонна туһаныы механизма сокуон барылыгар толору сурулунна. Оннук, сыл аайы инвентаризация ыытыллара этиллэр.
Республика уопсай дохуотун 15 бырыһыаныттан итэҕэһэ суох үбү-харчыны тыа хаһаайыстыбатын 12 хайысхатыгар арааран ыытар туһунан быһаарылынна. Ол эрээри ити чопчу суумата ыйыллыбытах. Тоҕо диэтэххэ, субсидия кээмэйэ уларыйа турар.

Республикаҕа тыа хаһаайыстыбатыгар маннык улахан инникилээх, кэскиллээх сокуон хаһан да ылылла илигэ.

Бу эйгэни сүрүннүүр элбэх сокуон баар эрээри, сокуон үксэ үлэлээбэт эбэтэр бэйэ бэйэлэрин утараллар. Саҥа сокуон күүһүгэр киирдэҕинэ, тыа хаһаайыстыбатын 42 сокуона тохтуохтаах. Ол иһигэр фермерствоны өйөөһүн, кымыһы оҥоруу, сылгыны иитии, кэтэх хаһаайыстыба, о.д.а. туһунан сокуоннар суох буолуохтара.

Бу күннэргэ «Саха Республикатыгар тыа хаһаайыстыбатын сайыннарыы туһунан» сокуон барыла республика быһылыгын э.т.  Е.А. Борисовка бэриллиэҕэ. Кини бигэргэтиитин кэнниттэн Государственнай Мунньах (Ил Түмэн) депутаттара сокуону дьүүллэһиэхтэрэ. Кинилэр сайыҥҥы сынньалаҥҥа тарҕаһыахтарын иннинэ пленарнай мунньахтарыгар бигэргэтиэхтэрэ.