Платон Ойуунускай «Дьулуруйар Ньургун Боотур» героическай эпос-олоҥхотун сахалыыттан тылбааһын Хотугулуу-Илиҥҥи федеральнай университет (ХИФУ) Олоҥхо научнай-чинчийэр института оҥордо. Кинигэр кылаабынай редактора Василий Иванов — СР академига, профессор, историческай наука доктора, ХИФУ Олоҥхо НЧИ директора.

36 000 тыһыынча хоһоонунан строкалаах айымньыны тылбаастааһын ХИФУ доцена филологическай наука кандидата Алина Находкина салалтатынан 10 сыл устата оҥоһулунна. Тылбааска кыттыыны ХИФУ тас дойду филологиятын уонна регионоведениетын Институтун тылбааска кафедратын үлэһиттэрэ, аспираннара, студеннара, биллиилээх тылбаасчыттар ылбыттара. Олоҥхо-поэма уһуна ортотунан 10 000 — 15 000 хоһоонунан строкалаах. Араас сюжеттары булкуйан, былыр саха олоҥхоһуттара өссө да уһун олоҥхолору айаллара, ол эрээри олор сурукка киирбэккэ хаалбыттара. 2005 сыл сэтинньитигэр ЮНЕСКО олоҥхону «киһи-аймах тылынан уонна материальнайа суох нэһилиэстибэтинэн» ааттаабыта.

Ыалдьыттарга эҕэрдэ тылы Великобританияҕа РФ Посольствотын Сүбэһитэ А.М.Крамаренко эттэ, кини Россия биир бөдөҥ регионун культуратын кэпсиир бу түгэн ураты суолталааҕын бэлиэтээтэ.

Университет ректора, наука доктора Евгения Михайлова Саха Республикатын президенин аатыттан Олоҥхону киэҥ эйгэҕэ таһаарбыттарын иһин наҕараадалары – филологическай наука кандидатыгар Светлана Егорова-Джонстоҥҥа грамотаны уонна суруктаах чаһыыны, Renaissance Books издательство директорыгар Пол Норберига (Paul Norbury) «Гражданскай килбиэн» бэлиэни туттарда.

Тэрээһин кэмигэр ыалдьыттар уонна кыттыбыт дьон, олор истэригэр биһиги биир дойдулаахтарбыт да, Британия научнай уонна культурнай эгэтин бэрэстэбиитэллэрэ, саха норуотун үгэстэрин кытта ыкса билистилэр. Көрөөччүлэр олоҥхону этээччилэр элбэх өрүттээх талааннарын бэлиэтээтилэр. Итини таһынан кинилэр хомуска оонньооһуну, олоҥхону, сиэр-туом ырыаларын уонна үҥкүүлэрин иһиттилэр, көрдүлэр. Түмүгэр баҕалаахтар фольклорнай үҥкүү коллективын оһуохайыгар кыттыстылар.

Киэһэҕэ кэлбит хас биирдии ыалдьыкка «Дьулуруйар Ньургун Боотур» олоҥхо кинигэтин туттардылар.