СИА-ҕа тылбаас бөлөҕүн салайааччы, олоҥхо НЧИ секторын сэбиэдиссэйэ Наталья Николаева эппитинэн, тылбаасчыт Алина Находкина аан бастаан саҥа ньыманы туттан үлэлээтэ, онон айымньы геройдарын ааттара уларытыллыбата. «Алина Находкина английскай тылга тылбааһын Владимир Державин тылбааһын кытта биир бастыҥ тылбааһынан ааҕабын», - диэтэ Александр Жирков.

Маны сэргэ киргизтэр Манастарын сахалыы тылбаастарын билиһиннэрдилэр. Манна икки бөлөх үлэлээбит - Трофима Кириллин уонна Тамары Петрова салайар бөлөхтөрө. «Тылбаастар Бексултан Жакиев нууччалыы тылбааһынан оҥоһулуннулар. Онно эпоска туттуллар аллитерация, онтон да атын ньымалар суохтара. Оттон сахалыы тылбааһыгар олор киллэрилиннилэр. Болдьоҕо олус ыгым этэ. Ол эрэн кэлин тиһэҕэр биир таһаарыыга тылбаастар иккиэн киллэрилиннилэр. Хайата ордугун ааҕааччы бэйэтэ быһаарыаҕа», - диэтэ ХИФУ олоҥхо научнай-чинчийэр институтун олоҥхоҕо уонна аан дойду эпоһыгар секторын сэбиэдиссэйэ Лилия Гарасимова.

Тэрээһиҥҥэ олоҥхоһут Петр Тихонов олоҥхоттон быһа тардыыны толордо, салгыы английскайдыы уонна киргизтии тылбаастартан ааҕан иһитиннэрдилэр.

Тылбаас бырайыагын олоххо киллэриигэ көмөлөспүт ХИФУ ректора Евгения Михайловаҕа истиҥник махтаннылар. Тылбааһы уонна бэчээттээһини Хотугулуу-Илиҥҥи федеральнай университет үбүлээтэ.

Тэрээһиҥҥэ үлэ бастыҥнара олоҥхо иккис уон сылын тэрийэн ыытар национальнай комитет бочуотунай грамоталарынан бэлиэтэннилэр. Эпоһы чинчийээччи Василий Илларионовка «Киргизия Өрөспүүбүлүкэтин культуратын туйгуна» аат туттарылынна.